முதல்வர் அலுவலகம் மாற்றும் விவகாரம்: டெண்டர் முறைகேடு புகாரை மறுத்த தமிழக அரசு

சென்னை நாமக்கல் கவிஞர் மாளிகையில் முதல்வர் அலுவலகம் அமைக்கும் பணிகளில் முறைகேடு என்ற குற்றச்சாட்டை தமிழக அரசு திட்டவட்டமாக மறுத்துள்ளது.

சென்னை நாமக்கல் கவிஞர் மாளிகையில் புதிய முதலமைச்சர் அலுவலகத்தை அமைப்பதற்கான டெண்டர் நடைமுறைகளில் முறைகேடுகள் நடைபெற்றதாக எழுந்த புகார்களை தமிழக அரசு திட்டவட்டமாக மறுத்துள்ளது. இது தொடர்பாக அரசு வெளியிட்டுள்ள அதிகாரப்பூர்வ செய்திக்குறிப்பில், எந்தவிதமான விதிமீறல்களும் நடைபெறவில்லை என்பது உறுதிப்படுத்தப்பட்டுள்ளது. நாமக்கல் கவிஞர் மாளிகையின் பத்தாவது தளத்தில் தற்போது நடைபெற்று வரும் பணிகள், அலுவலகத்தை அமைப்பதற்கான ஆரம்பகட்ட அளவீட்டுப் பணிகள் மட்டுமே என்று பொதுப்பணித்துறை விளக்கம் அளித்துள்ளது.

டெண்டர் நடைமுறைகள் அனைத்தும் வெளிப்படையான முறையில் மேற்கொள்ளப்பட்டு வருவதாக அரசு தெரிவித்துள்ளது. இதற்கான டெண்டர் அறிவிப்பு கடந்த ஆகஸ்ட் 13 ஆம் தேதி செய்தித்தாட்களிலும், மாநில டெண்டர் செய்திமடலிலும் வெளியிடப்பட்டது. அதனைத் தொடர்ந்து, ஆகஸ்ட் 15 ஆம் தேதி டெண்டர் இணையதளத்தில் பதிவேற்றம் செய்யப்பட்டு, ஆகஸ்ட் 17 ஆம் தேதி முதல் ஆவணங்கள் பொதுமக்களின் பார்வைக்குக் கிடைத்தன. ஆகஸ்ட் 15 மற்றும் 16 தேதிகள் அரசு விடுமுறை நாட்கள் என்பதால், அந்த கால அவகாசத்தைக் கணக்கில் கொண்டு நடைமுறைகள் பின்பற்றப்பட்டதாக அரசு தரப்பில் தெரிவிக்கப்பட்டுள்ளது.

டெண்டர் சமர்ப்பிப்பதற்கான கடைசித் தேதியான செப்டம்பர் 1 ஆம் தேதி வரை அனைத்து விண்ணப்பங்களும் முறையாக ஆய்வு செய்யப்படும். அதன் பின்னரே தகுதியான குறைந்தபட்ச ஏலதாரர் (L1 bidder) தேர்ந்தெடுக்கப்பட்டு, அவர்களுக்குப் பணி ஆணை வழங்கப்படும் என்று அரசு விளக்கியுள்ளது. அதுவரை அலுவலகம் தொடர்பான எந்தவொரு கட்டுமானப் பணிகளும் தொடங்கப்படாது என்றும், தற்போது பத்தாவது தளத்தில் நடைபெற்று வருபவை தளவாடங்களை அகற்றும் பணிகள் மட்டுமே என்றும் தெளிவுபடுத்தப்பட்டுள்ளது.

நாமக்கல் கவிஞர் மாளிகையின் பிளாக் 1, 2 மற்றும் 3 ஆகிய பகுதிகளில் மேற்கொள்ளப்பட வேண்டிய பணிகள் அனைத்தும் டெண்டர் இறுதி செய்யப்பட்ட பிறகு முறையாகத் தொடங்கும் என்று தெரிவிக்கப்பட்டுள்ளது. டெண்டர் இணையதளத்தில் பணிக்கான மதிப்பீட்டுத் தொகை குறித்த விவரங்கள் அனைத்தும் மிகத் தெளிவாகக் குறிப்பிடப்பட்டுள்ளதால், இந்தச் செயல்பாட்டில் எந்தவிதமான முறைகேடுகளுக்கும் வாய்ப்பில்லை என்று பொதுப்பணித்துறை அதிகாரிகள் தெரிவித்துள்ளனர். அரசு நிர்வாகத்தின் செயல்பாடுகளை மேம்படுத்தும் நோக்கில் மேற்கொள்ளப்படும் இந்த மாற்றம், அனைத்து சட்ட விதிகளுக்கும் உட்பட்டே செயல்படுத்தப்பட்டு வருகிறது.