தமிழக அரசு அதிரடி மாற்றம்: 5 நாட்களில் 16 சான்றிதழ்களை பெறலாம் - முழு விவரம்

தமிழ்நாட்டில் சாதிச் சான்றிதழ் உள்ளிட்ட 16 வகையான வருவாய்த்துறைச் சான்றிதழ்களை இனி 5 நாட்களில் பெறலாம் என தமிழக அரசு அறிவித்துள்ளது.

தமிழகத்தில் சாதிச் சான்றிதழ் மற்றும் பிற வருவாய்த்துறைச் சான்றிதழ்களைப் பெறுவதில் பொதுமக்களுக்கு ஏற்படும் காலதாமதத்தைத் தவிர்க்கும் நோக்கில், வருவாய்த்துறை மிக முக்கியமான சீர்திருத்தங்களை மேற்கொண்டுள்ளது. இதன்படி, சான்றிதழ் வழங்கும் நடைமுறையில் உள்ள பரிசீலனை நிலைகளை நான்கிலிருந்து மூன்றாகக் குறைத்து தமிழக அரசு உத்தரவிட்டுள்ளது. இந்த புதிய நடைமுறை அடுத்த வாரம் முதல் அமலுக்கு வரும் நிலையில், இதன் மூலம் விண்ணப்பதாரர்கள் தங்களுக்குத் தேவையான 16 வகையான சான்றிதழ்களை வெறும் ஐந்து நாட்களுக்குள்ளாகவே பெற்றுக்கொள்ள முடியும் என்று தெரிவிக்கப்பட்டுள்ளது.

இந்த மாற்றத்தின் கீழ், முன்னதாக வட்டாட்சியர் (Tahsildar) மட்டத்தில் வழங்கப்பட்டு வந்த 12 வகையான சான்றிதழ்களை, இனி துணை வட்டாட்சியர்களே (Deputy Tahsildar) வழங்க அதிகாரம் வழங்கப்பட்டுள்ளது. இதில் முதல் தலைமுறை பட்டதாரி சான்றிதழ், ஆதரவற்ற பெண் சான்றிதழ், விவசாய வருமானச் சான்றிதழ், விதவைச் சான்றிதழ், வேலையின்மைச் சான்றிதழ், குடும்ப இடப்பெயர்வுச் சான்றிதழ், சிறு மற்றும் குறு விவசாயிச் சான்றிதழ், பேரிடர்களால் கல்வி ஆவணங்களை இழந்ததற்கான சான்றிதழ், திருமணமாகாதவர் சான்றிதழ், மற்றும் பணப்பரிமாற்ற உரிமம் உள்ளிட்டவை அடங்கும். இது வட்டாட்சியர்களின் பணிச்சுமையைக் குறைப்பதோடு, விண்ணப்பங்களை விரைவாகக் கையாள வழிவகை செய்யும்.

அதேபோல், பிற்படுத்தப்பட்டோர் மற்றும் ஆதிதிராவிடர் சமூகச் சான்றிதழ்கள், வாரிசுச் சான்றிதழ் மற்றும் அடகு கடை உரிமம் ஆகிய நான்கு முக்கியச் சான்றிதழ்களை வழங்கும் அதிகாரம் சமூக பாதுகாப்புத் திட்ட வட்டாட்சியர்களுக்கு (Tahsildar - Social Security Scheme) மாற்றப்பட்டுள்ளது. சட்டம் ஒழுங்கு மற்றும் நிலப் பதிவேடு சார்ந்த பணிகளில் பிஸியாக இருக்கும் தாலுகா வட்டாட்சியர்களின் சுமையைக் குறைக்கும் வகையில் இந்த மாற்றம் கொண்டுவரப்பட்டுள்ளது. இருப்பினும், பழங்குடியினர் (ST) சான்றிதழ் வழங்குவதில் எவ்வித மாற்றமும் செய்யப்படவில்லை; அவை வழக்கம்போல வருவாய் கோட்டாட்சியர் (RDO) மூலமே தொடர்ந்து வழங்கப்படும்.

தமிழ்நாடு மின்-ஆளுமை முகமையின் (TNeGA) இணையதளம் வாயிலாக விண்ணப்பத்தின் தற்போதைய நிலையை பொதுமக்கள் நிகழ்நேரத்தில் கண்காணிக்க முடியும் என்பது இந்த புதிய நடைமுறையின் சிறப்பம்சமாகும். விண்ணப்பம் அங்கீகரிக்கப்பட்டவுடன், டிஜிட்டல் கையொப்பமிட்ட சான்றிதழை விண்ணப்பதாரர்களே பதிவிறக்கம் செய்துகொள்ளலாம் என்றும், நேரில் வந்து சான்றிதழ் பெற வேண்டிய அவசியம் இல்லை என்றும் அரசு தெளிவுபடுத்தியுள்ளது. கிராம நிர்வாக அலுவலர் அல்லது வருவாய் ஆய்வாளர் மூலம் சரிபார்க்கப்பட்டு, துணை வட்டாட்சியர் ஒப்புதலுடன் இந்தச் சான்றிதழ்கள் விரைந்து வழங்கப்படும். இந்த முன்னெடுப்பு, விண்ணப்பங்கள் தேங்கிக் கிடப்பதைத் தவிர்த்து, அரசு சேவைகளை சாமானிய மக்கள் எளிதில் பெறும் சூழலை உருவாக்கும் என்று எதிர்பார்க்கப்படுகிறது.