தமிழக அரசு துவரம் பருப்பு கொள்முதல்: மூன்று மாதத்தில் ரூ.187 கோடி சேமிப்பு

தமிழகத்தில் துவரம் பருப்பு கொள்முதலில் கடந்த மூன்று மாதங்களில் ரூ.187.56 கோடி அரசு நிதி சேமிக்கப்பட்டுள்ளதாக தகவல் வெளியாகியுள்ளது.

தமிழகத்தில் பொது விநியோகத் திட்டத்தின் கீழ் ரேஷன் கடைகளில் விநியோகிக்கப்படும் துவரம் பருப்பு கொள்முதலில் புதிய மாற்றங்கள் ஏற்பட்டுள்ளன. தமிழக அரசு, தற்போதைய கொள்முதல் விலையாக கிலோ ஒன்றுக்கு 77.89 ரூபாயை நிர்ணயித்துள்ளது. முந்தைய ஆட்சிக் காலத்தில் ஒரு கிலோ துவரம் பருப்பு 109.15 ரூபாய்க்கு கொள்முதல் செய்யப்பட்ட நிலையில், தற்போது சுமார் 31 ரூபாய் குறைவாக கொள்முதல் செய்யப்பட்டுள்ளது. இதன் மூலம் கடந்த மூன்று மாதங்களில் மட்டும் அரசுக்கு சுமார் 187.56 கோடி ரூபாய் நிதி சேமிக்கப்பட்டுள்ளது.

தமிழ்நாடு நுகர்பொருள் வாணிபக் கழகத்தின் (TNCSC) புள்ளிவிவரங்களின்படி, ஜூலை முதல் செப்டம்பர் வரையிலான காலகட்டத்தில் 60,000 டன் துவரம் பருப்பு கொள்முதல் செய்யப்பட்டுள்ளது. இதற்கு தற்போது 467.34 கோடி ரூபாய் செலவிடப்பட்டுள்ளது. அதே அளவு மற்றும் தரத்திலான பருப்பை முந்தைய ஆட்சியில் கொள்முதல் செய்ய 654.9 கோடி ரூபாய் செலவிடப்பட்டிருந்தது குறிப்பிடத்தக்கது. இந்த விலை குறைவு மற்றும் சேமிப்பு, அரசு நிதி நிர்வாகத்தில் ஏற்பட்டுள்ள குறிப்பிடத்தக்க மாற்றமாக பார்க்கப்படுகிறது.

இந்த கொள்முதல் விலை குறைப்பு குறித்து கருத்து தெரிவித்த தமிழ்நாடு நுகர்பொருள் வாணிபக் கழகத்தின் நிர்வாக இயக்குனர் ஷில்பா பிரபாகர் சதீஷ், கொள்முதலின் தரம் அல்லது விவரக்குறிப்புகளில் எவ்வித மாற்றமும் செய்யப்படவில்லை என்றும், நடைமுறையில் உள்ள அனைத்து டெண்டர் விதிகளும் முறையாகப் பின்பற்றப்பட்டதாகவும் தெரிவித்துள்ளார். இந்த முறை அதிகப்படியான விநியோகஸ்தர்கள் டெண்டரில் பங்கேற்றதே விலை குறைப்பிற்கு காரணமாக இருக்கலாம் என்றும் அவர் சுட்டிக்காட்டியுள்ளார்.

தற்போதைய சந்தை நிலவரப்படி பணவீக்கம் மற்றும் அத்தியாவசியப் பொருட்களின் விலை உயர்வு சூழலில், பருப்பு கொள்முதல் விலை குறைக்கப்பட்டிருப்பது பல்வேறு விவாதங்களை உருவாக்கியுள்ளது. இதே விலை நிர்ணய நடைமுறையை அடுத்த ஒன்பது மாதங்களுக்கும் தொடர்ந்து பின்பற்றினால், ஆண்டுக்கு சுமார் 750 கோடி ரூபாய் வரை அரசுக்கு கூடுதல் சேமிப்பு கிடைக்கும் என எதிர்பார்க்கப்படுகிறது. முன்னாள் முதல்வர் கருணாநிதியால் 2007-ஆம் ஆண்டு தொடங்கப்பட்ட சிறப்பு பொது விநியோகத் திட்டம், தற்போதும் தடையின்றி ரேஷன் கார்டுதாரர்களுக்கு மானிய விலையில் அத்தியாவசியப் பொருட்களை வழங்கி வருகிறது.