தமிழ்நாடு மருத்துவமனைகளில் மருந்து விலை கொள்ளைக்கு முற்றுப்புள்ளி: மருந்துக்கட்டுப்பாட்டு இயக்ககம் அதிரடி உத்தரவு

மருத்துவமனைகளில் மருந்துகளுக்கு அதிக விலை வசூலிப்பதைத் தடுக்கவும், போதை தரும் மருந்து விற்பனையைக் கட்டுப்படுத்தவும் தமிழ்நாடு மருந்துக்கட்டுப்பாட்டு இயக்ககம் அதிரடி உத்தரவு பிறப்பித்துள்ளது.

தமிழ்நாட்டில் உள்ள மருத்துவமனைகள் மற்றும் அவற்றுடன் இணைக்கப்பட்டுள்ள மருந்தகங்களில் நோயாளிகளிடம் மருந்துகள் மற்றும் மருத்துவ உபகரணங்களுக்கு அதிக விலை வசூலிக்கப்படுவதாக எழுந்த புகார்களைத் தொடர்ந்து, தமிழ்நாடு மருந்துக்கட்டுப்பாட்டு இயக்ககம் தீவிர நடவடிக்கைகளை முன்னெடுத்துள்ளது. மருத்துவமனைகள் மொத்த விற்பனை விலையில் தள்ளுபடி விலையில் கொள்முதல் செய்யும் மருந்துகளை, நோயாளிகளுக்கு வழங்கும் போது அச்சிடப்பட்ட அதிகபட்ச சில்லறை விலையில் (MRP) விற்பனை செய்வதைக் கண்டறிந்துள்ள நிலையில், இந்த அதிரடி உத்தரவு பிறப்பிக்கப்பட்டுள்ளது. இது தொடர்பாக மாநிலம் முழுவதும் உள்ள மருந்துக்கட்டுப்பாட்டு உதவி இயக்குநர்களுக்கு முறையான வழிகாட்டுதல்கள் வழங்கப்பட்டுள்ளன.

மருந்துக்கட்டுப்பாட்டு இயக்ககத்தின் இணை இயக்குநர் மற்றும் உரிம வழங்கும் அதிகாரியான எஸ். குருபாரதி அக்டோபர் 1-ஆம் தேதி வெளியிட்ட சுற்றறிக்கையில், அனைத்து மண்டல அதிகாரிகளும் தங்களுக்கு உட்பட்ட பகுதிகளில் உள்ள மருத்துவமனைகளில் திடீர் சோதனைகளை மேற்கொள்ள வேண்டும் என்று அறிவுறுத்தப்பட்டுள்ளது. குறிப்பாக, விலையுயர்ந்த மருந்துகள் மற்றும் ஊசி மருந்துகள் குறித்து கூடுதல் கவனம் செலுத்துமாறும், கொள்முதல் விலைக்கும் விற்பனை விலைக்கும் உள்ள முரண்பாடுகளைக் கண்டறிந்து ஆவணப்படுத்துமாறும் உத்தரவிடப்பட்டுள்ளது. விலை நிர்ணய விதிகளை மீறும் மருத்துவமனைகள் மீது மருந்து விலைக்கட்டுப்பாட்டு ஆணை 2013-இன் கீழ் சட்டப்படி கடுமையான நடவடிக்கை எடுக்கப்படும் என்று எச்சரிக்கப்பட்டுள்ளது.

இதனுடன் கூடுதலாக, போதை மற்றும் பழக்கத்தை உண்டாக்கும் மருந்துகளை அனுமதியின்றி விற்பனை செய்வதைத் தடுக்கவும் தீவிர கண்காணிப்புக்கு உத்தரவிடப்பட்டுள்ளது. டபென்டாடோல் (Tapentadol) மற்றும் நைட்ராசெபம் (Nitrazepam) போன்ற மருந்துகள் தவறாகப் பயன்படுத்தப்படுவது பொது சுகாதாரத்திற்கு பெரும் அச்சுறுத்தலாக உள்ளதாகக் கருதி, இதுபோன்ற மருந்துகளை விற்பனை செய்யும் சில்லறை மற்றும் மொத்த விற்பனை நிலையங்களில் அதிகாரிகள் அதிரடிச் சோதனைகளை நடத்த உள்ளனர். விற்பனை செய்யப்படும் மருந்துகளுக்கு முறையான மருத்துவர் பரிந்துரை சீட்டு உள்ளதா என்பது கட்டாயம் சரிபார்க்கப்படும்.

மருந்துக்கட்டுப்பாட்டு இயக்ககம் விடுத்துள்ள இந்த அறிவுறுத்தலின்படி, மருந்துகள் மற்றும் ஊசிகள் மட்டுமின்றி, அவற்றை தவறாகப் பயன்படுத்தும் வாய்ப்புள்ள சிரிஞ்சுகள் மற்றும் ஊசி முனைகள் குறித்தும் அதிகாரிகள் தீவிரமாகக் கண்காணிக்க வேண்டும். இருப்புப் பதிவேடுகளுக்கும், கையிருப்பில் உள்ள மருந்துகளின் உண்மை நிலவரத்திற்கும் இடையே ஏதேனும் முரண்பாடுகள் கண்டறியப்பட்டால், அது குறித்து விரிவான விசாரணை நடத்தப்பட்டு, சம்பந்தப்பட்டவர்கள் மீது உடனடி நடவடிக்கை எடுக்கப்படும். சோதனைகளை முடித்து, ஒருங்கிணைந்த அறிக்கையைத் தலைமை அலுவலகத்தில் சமர்ப்பிக்குமாறு அனைத்து உதவி இயக்குநர்களுக்கும் இறுதி எச்சரிக்கை விடுக்கப்பட்டுள்ளது.