தமிழகத்தில் மருத்துவக் காப்பீடு 25 லட்சமாக உயர்வு: முதல்வர் அறிவித்த அதிரடி திட்டங்கள் என்னென்ன?

தமிழகத்தில் முதலமைச்சரின் விரிவான மருத்துவக் காப்பீட்டுத் திட்டத்தின் கீழ் ஆண்டு காப்பீட்டுத் தொகை 5 லட்சத்திலிருந்து 25 லட்சமாக உயர்த்தப்படுவதாக முதல்வர் அறிவித்துள்ளார்.

தமிழகத்தில் வசிக்கும் ஏழை மற்றும் எளிய மக்கள் தரமான மருத்துவ சிகிச்சைகளைப் பெறுவதை உறுதி செய்யும் நோக்கில், முதலமைச்சரின் விரிவான மருத்துவக் காப்பீட்டுத் திட்டத்தின் கீழ் வழங்கப்படும் ஆண்டு காப்பீட்டுத் தொகையை 5 லட்சம் ரூபாயிலிருந்து 25 லட்சம் ரூபாயாக உயர்த்தி தமிழக முதல்வர் சி.ஜோசப் விஜய் அறிவித்துள்ளார். சட்டப்பேரவையில் 110-வது விதியின் கீழ் இந்த முக்கிய அறிவிப்பை வெளியிட்ட அவர், மருத்துவச் சிகிச்சை என்பது ஒவ்வொரு குடிமகனின் அடிப்படை உரிமை என்றும், வருமானம் அல்லது இருப்பிடத்தைக் கருத்தில் கொண்டு யாரும் தரமான சிகிச்சையிலிருந்து விலக்கப்படக் கூடாது என்பதில் அரசு உறுதியாக உள்ளது என்றும் தெரிவித்தார்.

சென்னை பெரம்பூரில் 300 கோடி ரூபாய் மதிப்பீட்டில் சர்வதேசத் தரத்திலான 400 படுக்கைகள் கொண்ட பன்னோக்கு மருத்துவமனை அமைக்கப்படும் என்பது அரசின் மிக முக்கியமான திட்டங்களில் ஒன்றாகும். மாநிலம் முழுவதும் நிலவும் மருத்துவப் பணியாளர்கள் பற்றாக்குறையைப் போக்கும் வகையில், செவிலியர் மற்றும் மருந்தியல் படிப்புகளில் கூடுதல் இடங்களை உருவாக்குவதற்காக 351 கோடி ரூபாய் நிதி ஒதுக்கீடு செய்யப்பட்டுள்ளது. இதன் ஒரு பகுதியாக, ஏழு புதிய செவிலியர் கல்லூரிகள் தொடங்கப்பட உள்ளதோடு, ஏற்கனவே உள்ள கல்வி நிறுவனங்களின் கட்டமைப்புகளும் விரிவுபடுத்தப்பட உள்ளன.

புற்றுநோய் சிகிச்சையை மேம்படுத்தும் நோக்கில் முதலமைச்சரின் புற்றுநோய் சிகிச்சைத் திட்டம் 677.44 கோடி ரூபாய் பட்ஜெட்டில் மேம்படுத்தப்பட உள்ளது. மேலும், சென்னை ராஜீவ் காந்தி அரசு பொது மருத்துவமனையில் 471.80 கோடி ரூபாய் செலவில் தரைத்தளம் மற்றும் நான்கு அடுக்குகள் கொண்ட ஒருங்கிணைந்த புற்றுநோய் சிகிச்சை மையம் நிறுவப்பட உள்ளது. இதோடு மட்டுமல்லாமல், தஞ்சாவூர், கோயம்புத்தூர் மற்றும் மதுரை உள்ளிட்ட மாவட்டங்களில் ஐந்து பிராந்திய புற்றுநோய் சிகிச்சை மையங்கள் புதிதாக அமைக்கப்பட உள்ளதாக முதல்வர் தெரிவித்தார்.

புற்றுநோய் சிகிச்சையில் நவீன தொழில்நுட்பங்களைப் புகுத்தும் வகையில் ரோபோடிக் அறுவை சிகிச்சை வசதிகள் மற்றும் லீனியர் ஆக்சிலரேட்டர் உள்ளிட்ட நவீன உபகரணங்கள் மருத்துவமனைகளில் நிறுவப்பட உள்ளன. பெண்களின் ஆரோக்கியத்தில் சிறப்பு கவனம் செலுத்தும் வகையில், கருப்பை வாய் புற்றுநோயை ஆரம்ப நிலையிலேயே கண்டறியும் ஹெச்பிவி டிஎன்ஏ பரிசோதனைகள் மற்றும் ஊட்டச்சத்து ஆதரவுத் திட்டங்களும் செயல்படுத்தப்படவுள்ளன. அதேபோல், திருநங்கைகளுக்குத் தேவையான சிறப்பு மருத்துவ மற்றும் அறுவை சிகிச்சை சேவைகளை உறுதி செய்ய சென்னை, திருநெல்வேலி, தூத்துக்குடி மற்றும் கன்னியாகுமரி உள்ளிட்ட ஏழு அரசு மருத்துவக் கல்லூரி மருத்துவமனைகளில் முன்னுரிமை வழங்கப்படும் என்றும் அவர் உறுதியளித்தார்.