தமிழ்நாடு: சேவை முதுநிலை மருத்துவர்களுக்கான பணியிட மாற்றக் கலந்தாய்வு அக்டோபர் 22-ல் தொடக்கம்

தமிழ்நாட்டில் சேவை முதுநிலை மருத்துவப் பட்டதாரிகளுக்கான கலந்தாய்வு வரும் அக்டோபர் 22-ஆம் தேதி நடைபெறும் என மருத்துவக் கல்வி மற்றும் ஆராய்ச்சி இயக்ககம் அறிவித்துள்ளது.

தமிழ்நாட்டில் மருத்துவக் கல்வி மற்றும் ஆராய்ச்சி இயக்ககத்தின் (DME) கீழ் பணியாற்றும் சேவை முதுநிலை மருத்துவப் பட்டதாரிகளுக்கான பணியிட ஒதுக்கீட்டு கலந்தாய்வு வரும் அக்டோபர் 22-ஆம் தேதி நடைபெறும் என்று அதிகாரப்பூர்வமாக அறிவிக்கப்பட்டுள்ளது. கடந்த அக்டோபர் 5-ஆம் தேதி எவ்வித முறையான கலந்தாய்வும் இன்றி, தற்காலிகப் பணியிட மாற்ற உத்தரவுகளை மருத்துவக் கல்வி மற்றும் ஆராய்ச்சி இயக்ககம் பிறப்பித்திருந்தது. இந்த நடவடிக்கை மருத்துவர்களிடையே பெரும் குழப்பத்தையும் அதிருப்தியையும் ஏற்படுத்தியிருந்த நிலையில், தற்போது கலந்தாய்வு குறித்த அறிவிப்பு வெளியாகியுள்ளது.

சுமார் 500-க்கும் மேற்பட்ட மருத்துவர்கள் ஏற்கனவே தங்களுக்கு ஒதுக்கப்பட்ட புதிய பணியிடங்களில் பொறுப்பேற்றுப் பணியாற்றி வருகின்றனர். தற்காலிக உத்தரவின் அடிப்படையில் பணியில் சேர்ந்த மருத்துவர்கள், தற்போது அந்தப் பணியிடங்களில் சரிவர செட்டில் ஆகிக்கொண்டிருக்கும் சூழலில், திடீரென கலந்தாய்வு அறிவிக்கப்பட்டிருப்பது அவர்கள் மத்தியில் நிச்சயமற்ற நிலையை உருவாக்கியுள்ளது. குறிப்பாக, பல பெண் மருத்துவர்கள் தங்கள் சொந்த ஊர்களில் இருந்து நீண்ட தூரம் பயணம் செய்து பணியைச் செய்து வரும் நிலையில், இந்த அறிவிப்பு கூடுதல் மன உளைச்சலை ஏற்படுத்தியுள்ளதாக பாதிக்கப்பட்ட மருத்துவர்கள் தெரிவித்துள்ளனர்.

மருத்துவர்கள் தரப்பில் முன்வைக்கப்படும் முக்கிய குற்றச்சாட்டு என்னவென்றால், கலந்தாய்வை விரைவாக நடத்த முடியும் என்றால், ஏன் அவசர கதியில் தற்காலிகப் பணியிட மாற்றங்களைச் செய்து அவர்களைத் தற்போதைய பணியிடங்களில் இருந்து விடுவித்தீர்கள் என்பதுதான். தற்காலிக ஒதுக்கீட்டின் போது மருத்துவர்களின் விருப்பங்கள் கேட்கப்படாமல், காலிப் பணியிடங்களின் அடிப்படையில் மட்டுமே ஒதுக்கீடு செய்யப்பட்டதால், பலர் தங்கள் இருப்பிடத்திற்கு வெகு தொலைவில் உள்ள மருத்துவமனைகளில் பணியாற்றும் கட்டாயத்திற்குத் தள்ளப்பட்டுள்ளனர். இப்போது நடக்கவிருக்கும் கலந்தாய்வில் தாங்கள் அதே இடத்தில் தக்கவைக்கப்படுவோமா அல்லது மீண்டும் இடமாற்றம் செய்யப்படுவோமா என்ற குழப்பத்தில் அவர்கள் உள்ளனர்.

சம்பளப் பட்டுவாடாவை முறைப்படுத்துவதற்காகவே இந்த தற்காலிக ஏற்பாடு செய்யப்பட்டதாக சுகாதாரத்துறை தரப்பில் விளக்கம் அளிக்கப்பட்டது. கடந்த ஆண்டு அக்டோபர் மாதம் படிப்பை முடித்த சேவை முதுநிலை மருத்துவர்களுக்கு டிசம்பர் மாதத்தில்தான் கலந்தாய்வு நடத்தப்பட்டது, இது ஊதிய தாமதத்திற்கு வழிவகுத்தது என்று கூறப்படுகிறது. இருப்பினும், கலந்தாய்வு முடியும் வரை மருத்துவர்கள் தங்கள் மருத்துவக் கல்லூரி மருத்துவமனைகளிலேயே பணியைத் தொடர்ந்தால் எவ்வித ஊதியப் பிரச்சினையும் ஏற்படாது என்று மருத்துவர்கள் வாதிடுகின்றனர். இதற்கிடையே, மருத்துவ சேவைகள் இயக்ககம் தங்களது கட்டுப்பாட்டில் உள்ள மற்ற மருத்துவமனைகளில் பணியாற்றும் சேவை முதுநிலை மருத்துவர்களுக்கும் தற்காலிகப் பணி ஒதுக்கீடு குறித்த சுற்றறிக்கையை வெளியிட்டுள்ளது குறிப்பிடத்தக்கது.