பசுமை ஆற்றல் சேமிப்பில் புதிய மைல்கல்: 2027-க்குள் 2,500 மெகாவாட் மணிநேர திறனை எட்ட தமிழ்நாடு அரசு திட்டம்

தமிழ்நாட்டில் 2027-ஆம் ஆண்டுக்குள் 2,500 மெகாவாட் மணிநேர மின் சேமிப்புத் திறன் இலக்கை அடைய அரசு திட்டமிட்டுள்ளது.

தமிழ்நாட்டில் பசுமை எரிசக்தி உற்பத்தியை ஊக்குவிப்பதோடு, உற்பத்தி செய்யப்படும் மின்சாரத்தை முறையாகச் சேமித்து வைப்பதற்கான விரிவான திட்டங்களை மாநில அரசு முன்னெடுத்துள்ளது. இதன்படி, மத்திய அரசின் வழிகாட்டுதல்களின்படி, 2029-30-ஆம் நிதியாண்டிற்குள் மாநிலத்தின் மொத்த புதுப்பிக்கத்தக்க எரிசக்தி உற்பத்தியில் 4 சதவீதத்தை மின் சேமிப்பு அமைப்புகள் மூலம் கையாள இலக்கு நிர்ணயிக்கப்பட்டுள்ளது என்று எரிசக்தித் துறை அமைச்சர் சி.டி.ஆர். நிர்மல்குமார் சட்டமன்றத்தில் தெரிவித்தார்.

எரிசக்தித் துறை மானியக் கோரிக்கை மீதான விவாதத்தின் போது பேசிய அமைச்சர், புதுப்பிக்கத்தக்க எரிசக்தியை மின்கட்டமைப்போடு இணைக்கும்போது ஏற்படும் சவால்கள் குறித்து விளக்கினார். குறிப்பாக, சூரிய ஒளி மற்றும் காற்று மூலம் கிடைக்கும் மின்சாரத்தில் ஏற்படும் ஏற்ற இறக்கங்களைச் சமாளிக்க, வழக்கமான அனல் மின் நிலையங்களில் உற்பத்தியை அடிக்கடி அதிகரிக்கவும் குறைக்கவும் வேண்டிய கட்டாயம் ஏற்படுகிறது. இது மின் கட்டமைப்பிற்கு அதிக அழுத்தத்தை அளிப்பதாகக் குறிப்பிட்ட அமைச்சர், இதைக் களைவதற்கு பேட்டரி எரிசக்தி சேமிப்பு அமைப்புகள் (BESS) பெரிதும் உதவும் என்று தெரிவித்தார். இதன் மூலம் மின் தேவை மற்றும் விநியோகத்தில் நிலவும் ஏற்ற இறக்கங்களைச் சீராக நிர்வகிக்க முடியும்.

இந்த இலக்கை அடையும் வகையில், தமிழ்நாடு பசுமை எரிசக்தி நிறுவனம் (TNGECL) பல்வேறு திட்டங்களைச் செயல்படுத்தி வருகிறது. முதற்கட்டமாக, மாநில அரசின் நிதி பங்களிப்புடன் (VGF) 1,000 மெகாவாட் மணிநேர திறன் கொண்ட மின் சேமிப்பு நிலையங்கள் அமைக்கப்பட உள்ளன. தென்ணம்பட்டி, அனுப்பன்குளம், ஒட்டப்பிடாரம், வெள்ளாளவிடுதி, கயத்தாறு மற்றும் காரைக்குடி ஆகிய பகுதிகளில் உள்ள மின்சார வாரிய துணை மின்நிலையங்களில் இந்தத் திட்டங்கள் செயல்படுத்தப்படும். இந்த 500 மெகாவாட் திறன் கொண்ட திட்டங்கள், வரும் 2026-ஆம் ஆண்டு டிசம்பர் மாதத்திற்குள் செயல்பாட்டிற்கு கொண்டு வரப்படும் என்று எதிர்பார்க்கப்படுகிறது.

மேலும், மத்திய அரசின் மின் கட்டமைப்பு மேம்பாட்டு நிதியுதவியுடன் கூடுதலாக 1,500 மெகாவாட் மணிநேர மின் சேமிப்புத் திறனை உருவாக்கும் முயற்சியில் அரசு இறங்கியுள்ளது. இதற்காக தப்பகுண்டு, தஞ்சாக்குறிச்சி, பல்லடம், அழகர்கோவில், கமுதி, காரமடை, அணைகடவு, திருவாரூர், ஒத்தக்கால்மண்டபம், துவாக்குடி மற்றும் என். சுப்பையாபுரம் ஆகிய 11 இடங்களில் துணை மின்நிலையங்கள் அடையாளம் காணப்பட்டுள்ளன. இந்தத் திட்டங்கள் அனைத்தும் 2027-ஆம் ஆண்டு செப்டம்பர் மாதத்திற்குள் முழுமையாகச் செயல்பாட்டுக்கு வரும். இந்த முயற்சியின் மூலம் தமிழ்நாட்டின் பசுமை எரிசக்தி மாற்றமானது வலுவான கட்டமைப்பை எட்டும் என்று அரசு நம்பிக்கை தெரிவித்துள்ளது.