பருவமழை கால அவசர கால பணிகளுக்கு தமிழ்நாடு காவல் துறை தயார்: டிஜிபி மகேஷ் குமார் அகர்வால் தகவல்

வடகிழக்கு பருவமழையை எதிர்கொள்ள தமிழ்நாடு காவல் துறை முழு தயார் நிலையில் உள்ளதாக டிஜிபி மகேஷ் குமார் அகர்வால் தெரிவித்துள்ளார்.

தமிழ்நாட்டில் வரவிருக்கும் பருவமழை காலத்தை எதிர்கொள்ளவும், மழைக்காலங்களில் ஏற்படும் அவசர கால சூழல்களை திறம்பட கையாளவும் தமிழ்நாடு காவல் துறை முழுமையான தயார் நிலையில் இருப்பதாக காவல் துறை தலைமை இயக்குநர் டாக்டர் மகேஷ் குமார் அகர்வால் தெரிவித்துள்ளார். அவசர கால மீட்புப் பணிகளுக்காக பேரிடர் மீட்புப் படைக்குத் தேவையான நவீன உபகரணங்கள் மற்றும் தொழில்நுட்ப வசதிகள் தயார் நிலையில் வைக்கப்பட்டுள்ளதாக அவர் உறுதிபடக் கூறினார்.

ஆவடி காவல் ஆணையரகத்தில் நடைபெற்ற காவல் குடும்பம் திட்டத்தின் ஒரு பகுதியாக, காவலர்களின் நலன் சார்ந்த நலத்திட்ட நிகழ்ச்சியில் கலந்துகொண்ட பிறகு செய்தியாளர்களைச் சந்தித்து அவர் இதனைத் தெரிவித்தார். பருவமழை காலங்களில் ஏற்படும் பாதிப்புகளைக் குறைக்கவும், பேரிடர் காலங்களில் பொதுமக்களுக்குத் தேவையான உதவிகளை விரைவாக வழங்கவும் பிற அரசுத் துறைகளுடன் இணைந்து ஒருங்கிணைந்த செயல்பாடுகளை மேற்கொள்ளத் திட்டமிடப்பட்டுள்ளதாக டிஜிபி மகேஷ் குமார் அகர்வால் தெரிவித்தார்.

இந்த நிகழ்ச்சியின் ஒரு பகுதியாக, காவல் குடும்பம் திட்டத்தின் தலைவர் டாக்டர் வனிதா அகர்வால், ஆவடி எஸ்.எம். நகர் காவல் குடியிருப்பில் புதிய பகல் நேரக் காப்பகத்தைத் திறந்து வைத்தார். காவலர்களின் குழந்தைகளுக்காகவும், அவர்களது குடும்பத்தினரின் நலனுக்காகவும் இத்தகைய முன்னெடுப்புகள் தொடர்ந்து மேற்கொள்ளப்படும் என்று தெரிவிக்கப்பட்டது. மேலும், எஸ்.எம். நகர் காவல் மாநாட்டு மையத்தில் அப்பல்லோ மருத்துவமனையுடன் இணைந்து ஏற்பாடு செய்யப்பட்டிருந்த சிறப்பு மருத்துவ முகாமையும் டாக்டர் வனிதா அகர்வால் தொடங்கி வைத்தார்.

சுமார் 500-க்கும் மேற்பட்ட காவல் துறை பணியாளர்கள் மற்றும் அவர்களது குடும்ப உறுப்பினர்கள் இந்த மருத்துவ முகாமின் மூலம் பயனடைந்தனர். இதில் பொது மருத்துவப் பரிசோதனைகள் மட்டுமின்றி, இதயம், நுரையீரல், ரத்த நாளங்கள் தொடர்பான பரிசோதனைகள் மற்றும் கண் பரிசோதனைகள் எனப் பல்வேறு சிறப்பு மருத்துவ சேவைகள் வழங்கப்பட்டன. இந்த நிகழ்ச்சியில் ஆவடி காவல் ஆணையர் செந்தில்குமார் மற்றும் காவல் துறையின் உயர் அதிகாரிகள் பலர் கலந்துகொண்டு சிறப்பித்தனர்.