தமிழ்நாடு மின்சார தேவை அதிகரிப்பு: பண்டிகை கால மின்வெட்டை தவிர்க்க கூடுதல் கொள்முதல் - அமைச்சர் நிர்மல் குமார்

தமிழ்நாட்டில் பண்டிகை கால மின் தேவையை பூர்த்தி செய்ய தற்காலிகமாக கூடுதல் மின்சாரம் கொள்முதல் செய்யப்படுவதாக மின்சாரத்துறை அமைச்சர் சி.டி.ஆர். நிர்மல் குமார் விளக்கமளித்துள்ளார்.

தமிழ்நாட்டில் அதிகரித்து வரும் மின்சாரத் தேவையை சமாளிக்கவும், பண்டிகைக் காலங்களில் மின்வெட்டு ஏற்படாமல் தடையற்ற மின்சாரத்தை பொதுமக்களுக்கு வழங்கவும் தமிழக அரசு பல்வேறு நடவடிக்கைகளை எடுத்து வருகிறது. இது தொடர்பாக சென்னை தலைமைச் செயலகத்தில் செய்தியாளர்களைச் சந்தித்த மின்சாரத் துறை அமைச்சர் சி.டி.ஆர். நிர்மல் குமார், தற்போதைய சூழலில் மின்சாரம் கொள்முதல் செய்ய வேண்டியதன் அவசியத்தை விளக்கினார். கடந்த ஆண்டு இதே காலகட்டத்தில் சுமார் 16,800 மெகாவாட் ஆக இருந்த உச்சக்கட்ட மின் தேவை, தற்போது 21,700 மெகாவாட் ஆக உயர்ந்துள்ளது. இது சுமார் 4,000 முதல் 5,000 மெகாவாட் வரை கூடுதல் மின்சாரத்தின் தேவையைக் உருவாக்கியுள்ளதாக அவர் தெரிவித்தார்.

மின்சாரத் தேவையைப் பூர்த்தி செய்ய அக்டோபர் 15 முதல் 31-ஆம் தேதி வரை சுமார் 3,500 மெகாவாட் மின்சாரத்தைக் கொள்முதல் செய்ய டெண்டர் கோரப்பட்டுள்ளதாக அமைச்சர் குறிப்பிட்டார். இருப்பினும், சந்தையில் நிலவும் விலை மற்றும் தற்போதைய தேவையைப் பொறுத்து சுமார் 1,500 மெகாவாட் மின்சாரத்தை மட்டுமே கொள்முதல் செய்ய அரசு திட்டமிட்டுள்ளது. ஒரு யூனிட் மின்சாரம் சுமார் 35 ரூபாய் என்ற விலையில் கொள்முதல் செய்யப்பட வாய்ப்புள்ளது. இதன் காரணமாக தினசரி கூடுதல் செலவாக சுமார் 5 கோடி ரூபாய் ஏற்படும் என்றாலும், மாலை 6 மணி முதல் நள்ளிரவு வரையிலான உச்சக்கட்ட மின் தேவையை ஈடுகட்டவே இந்த நடவடிக்கை எடுக்கப்படுவதாக அவர் விளக்கம் அளித்தார்.

மின்சாரக் கொள்முதல் செலவைக் குறைக்கும் நோக்கில் நீண்ட கால மின் கொள்முதல் ஒப்பந்தங்களுக்கான டெண்டர்களை இந்த மாதமே வெளியிட தமிழக அரசு திட்டமிட்டுள்ளது. இதுதவிர, 2028-2029-ஆம் ஆண்டுக்குள் சுமார் 6,000 முதல் 8,000 மெகாவாட் கூடுதல் மின்சாரத்தை உறுதி செய்யும் வகையில் அரசு தொலைநோக்குத் திட்டங்களை வகுத்து வருவதாகவும் அமைச்சர் கூறினார். மத்திய மின் நிலையங்கள் மற்றும் நெய்வேலி பழுப்பு நிலக்கரி நிறுவனம் மூலம் கிடைக்க வேண்டிய பங்கீட்டில் சுமார் 1,800 மெகாவாட் குறைவாகக் கிடைப்பதே இந்த மின் பற்றாக்குறைக்கு முக்கியக் காரணமாக இருப்பதாக அவர் சுட்டிக்காட்டினார். மேலும், காற்று மின்சாரம் எதிர்பார்த்த 3,500 மெகாவாட்டில் இருந்து 500 மெகாவாட்டாகக் குறைந்துள்ளதும் சவாலாக உள்ளது.

சூரிய மின்சக்தி கொள்முதல் நடைமுறைகளில் நிலவிய குளறுபடிகள் காரணமாக ஏற்பட்டதாகக் கூறப்படும் சுமார் 1,000 கோடி ரூபாய் இழப்பைத் தவிர்க்க, புதிய விண்ணப்பங்கள் தற்காலிகமாக நிறுத்தி வைக்கப்பட்டுள்ளன. பேட்டரி மின் சேமிப்புக் கொள்கைகளை வகுக்கும் வரை இந்த நடைமுறை தொடரும் என்றும், மின்சார விநியோகத்தில் வெளிப்படைத்தன்மையை மேம்படுத்த ஆன்லைன் கண்காணிப்பு மற்றும் தொழில்நுட்ப சரிபார்ப்பு முறைகள் உருவாக்கப்பட்டு வருவதாகவும் அமைச்சர் தெரிவித்தார். விலை உயர்ந்த நேப்தா அடிப்படையிலான மின்சாரத்தைத் தவிர்த்து, குறைந்த விலையில் மின்சாரத்தைப் பெற அனைத்து வழிகளிலும் அரசு முயற்சித்து வருகிறது என்று அவர் உறுதி அளித்தார்.