தமிழ்நாட்டின் நகரங்களில் 25 ஆண்டு கால உட்கட்டமைப்பு மேம்பாட்டு திட்டம்: ஆலோசகர்களை அழைக்கிறது தமிழக அரசு

தமிழ்நாட்டின் முக்கிய நகரங்களில் அடுத்த 25 ஆண்டுகளுக்கான உட்கட்டமைப்பு மேம்பாட்டு திட்டங்களை உருவாக்க ஆலோசகர்களை நியமிக்க தமிழக அரசு அழைப்பு விடுத்துள்ளது.

தமிழ்நாட்டில் உள்ள பல்வேறு நகர்ப்புற உள்ளாட்சி அமைப்புகளின் எதிர்கால தேவைகளை கருத்தில் கொண்டு, அடுத்த 25 ஆண்டுகளுக்கான விரிவான உட்கட்டமைப்பு மேம்பாட்டுத் திட்டங்களை (CIDP) தயாரிப்பதற்கான நடவடிக்கைகளை தமிழக அரசு தொடங்கியுள்ளது. முதலமைச்சரின் ஒருங்கிணைந்த நகர்ப்புற மேம்பாட்டுத் திட்டத்தின் (CMIUDM) ஒரு பகுதியாக, 2026-2031 வரையிலான காலக்கட்டத்திற்காக இந்த முக்கிய முன்னெடுப்பு மேற்கொள்ளப்படுகிறது. இதற்கான தகுதியான ஆலோசகர்களை நியமிக்க தமிழ்நாடு நகர்ப்புற உட்கட்டமைப்பு நிதிச் சேவைகள் நிறுவனம் (TNUIFSL) அழைப்பு விடுத்துள்ளது.

உலக வங்கி நிதி உதவியுடன் செயல்படுத்தப்படும் தமிழ்நாடு காலநிலை மாற்றத்தை தாங்கும் நகர்ப்புற மேம்பாட்டுத் திட்டத்தின் கீழ், இந்த பணிகள் மேற்கொள்ளப்பட உள்ளன. இந்தத் திட்டம் சென்னை, திருநெல்வேலி, நாகர்கோவில், தூத்துக்குடி, சிவகாசி, ஆவடி, தாம்பரம், கடலூர், வேலூர், திருவண்ணாமலை, கோயம்புத்தூர், ஈரோடு, திருப்பூர், சேலம் மற்றும் ஓசூர் ஆகிய மாநகராட்சிகளையும், உதகமண்டலம் சிறப்பு நிலை நகராட்சியையும் உள்ளடக்கியது. இந்த நகரங்களில் தற்போதுள்ள உட்கட்டமைப்பு வசதிகளின் தரம் மற்றும் எதிர்கால தேவைகளை மதிப்பீடு செய்வதே இந்த திட்டத்தின் முதன்மை நோக்கமாகும்.

நியமிக்கப்படும் ஆலோசகர்கள் கள ஆய்வு, புவிசார் தகவல் அமைப்பு (GIS) வரைபடம் மற்றும் பல்வேறு பங்குதாரர்களிடம் கருத்துக்களைப் பெறுவதன் மூலம் நகரங்களின் தற்போதைய நிலையை விரிவாக ஆய்வு செய்வார்கள். குடிநீர் விநியோகம், கழிவுநீர் அகற்றுதல், மழைநீர் வடிகால், திடக்கழிவு மேலாண்மை, சாலைகள், பூங்காக்கள், பொது சுகாதாரம் மற்றும் டிஜிட்டல் நகராட்சி சேவைகள் எனப் பல துறைகளில் இந்த மதிப்பீடு அமையும். மேலும், காலநிலை மாற்றத்தினால் ஏற்படக்கூடிய பாதிப்புகள் மற்றும் பேரிடர் அபாயமுள்ள பகுதிகளைக் கண்டறிவதும் இத்திட்டத்தின் முக்கிய அங்கமாகும்.

நிதி சார்ந்த மதிப்பீட்டில், கடந்த ஐந்து ஆண்டுகளில் அந்தந்த உள்ளாட்சி அமைப்புகளின் செயல்திறன் மற்றும் வருவாயை உயர்த்தும் வழிமுறைகள் குறித்து விரிவாக ஆராயப்படும். அடுத்த 5, 10, 15, 20 மற்றும் 25 ஆண்டுகளுக்கான மக்கள் தொகை பெருக்கம் மற்றும் சேவைத் தேவைகள் கணிக்கப்பட்டு, அதற்கேற்ப முதலீட்டுத் திட்டங்கள் வகுக்கப்படும். குறுகிய, நடுத்தர மற்றும் நீண்ட கால அடிப்படையில் செயல்படுத்தப்பட வேண்டிய திட்டங்களுக்கான வரைபடத்தை உருவாக்கி, அதன் மூலம் நகரங்களின் கட்டமைப்பை வலுப்படுத்த தமிழக அரசு திட்டமிட்டுள்ளது.