தென்காசி: பழுதடைந்த அங்கன்வாடி கட்டிடம் - அடிப்படை வசதிகள் இன்றி தவிக்கும் குழந்தைகள்

தென்காசி மாவட்டம் வடக்கு கிடாரகுளம் பகுதியில் அங்கன்வாடி மையம் உரிய கட்டிட வசதியின்றி செயல்படுவதால் பெற்றோர்கள் குழந்தைகளை அனுப்ப தயக்கம் காட்டுகின்றனர்.

தென்காசி மாவட்டம் ஆலங்குளம் அருகே உள்ள வடக்கு கிடாரகுளம் கிராமத்தில் அமைந்துள்ள அங்கன்வாடி மையம், முறையான கட்டிட வசதி இல்லாததாலும், அடிப்படைத் தேவைகள் பூர்த்தி செய்யப்படாததாலும் பெரும் சிக்கலைச் சந்தித்து வருகிறது. பல ஆண்டுகளுக்கு முன்பு கட்டப்பட்ட இந்த அங்கன்வாடி கட்டிடம், கடந்த இரண்டு ஆண்டுகளுக்கு முன்பே சிதிலமடைந்து பயன்பாட்டிற்கு தகுதியற்ற நிலையில் காணப்படுகிறது. இதன்காரணமாக, அங்கன்வாடி மையம் தற்போது தற்காலிகமாக ஒரு ஆஸ்பெஸ்டாஸ் கூரை கொண்ட வாடகைக் கட்டிடத்தில் இயங்கி வருகிறது.

இந்த தற்காலிக மையத்தில் குடிநீர் மற்றும் கழிப்பறை போன்ற மிக அவசியமான அடிப்படை வசதிகள் கூட இல்லை என்று அப்பகுதி மக்கள் குற்றம் சாட்டுகின்றனர். முன்னதாக, பழைய கட்டிடத்தில் மையம் இயங்கியபோது 40-க்கும் மேற்பட்ட குழந்தைகள் அங்கு பயின்று வந்தனர். ஆனால், கட்டிடத்தின் மேற்கூரை பூச்சுகள் பெயர்ந்ததாலும், மழைநீர் உள்ளே புகுந்ததாலும் பெற்றோர்கள் தங்கள் குழந்தைகளை அங்கன்வாடிக்கு அனுப்பத் தயங்கி வருகின்றனர். தற்போது சுமார் 20 குழந்தைகள் மட்டுமே இந்த வசதியற்ற சூழலில் கல்வி பயின்று வருகின்றனர்.

கிராம மக்கள் இது குறித்து மாவட்ட ஆட்சியர், ஆலங்குளம் சட்டமன்ற உறுப்பினர் மற்றும் ஊராட்சி ஒன்றியத் தலைவர் எனப் பல அதிகாரிகளிடம் தொடர்ந்து மனு அளித்தும் எந்தவித நடவடிக்கையும் எடுக்கப்படவில்லை. தற்போது இயங்கி வரும் வாடகைக் கட்டிடத்தின் உரிமையாளரும், நெல் மூட்டைகளை அடுக்கி வைக்க அந்த அறையைக் காலி செய்யுமாறு கோரியுள்ளார். மேலும், சமையலறை வசதி இல்லாததால், குழந்தைகள் சமையல் எரிவாயு உருளைக்கு அருகிலேயே தூங்க வேண்டிய ஆபத்தான சூழல் நிலவுவதாகவும், மழைக்காலங்களில் மின் கசிவு ஏற்பட வாய்ப்புள்ளதாகவும் அச்சம் தெரிவிக்கின்றனர்.

இது குறித்து ஒருங்கிணைந்த குழந்தை வளர்ச்சிப் பணிகள் திட்ட அலுவலர் மாரியப்பன் கூறுகையில், வடக்கு கிடாரகுளம் கிராமத்தில் புதிய அங்கன்வாடி கட்டிடம் கட்டுவதற்கு முன்னுரிமை அளிக்குமாறு ஆலங்குளம் வட்டார வளர்ச்சி அலுவலருக்கு அறிவுறுத்தப்பட்டுள்ளதாகத் தெரிவித்தார். அடிப்படை வசதிகள் கொண்ட ஒரு மாற்றுத் தற்காலிக இடத்திற்கு குழந்தைகளை விரைவில் இடமாற்றம் செய்வதற்கான நடவடிக்கைகள் எடுக்கப்படும் என்றும் அவர் உறுதியளித்துள்ளார். இருப்பினும், நிரந்தரமான புதிய கட்டிடம் அமையும் வரை குழந்தைகளின் பாதுகாப்பு மற்றும் கல்வித் தேவை கேள்விக்குறியாகவே உள்ளது.