திருவள்ளூர் அமோனியா கசிவு எதிரொலி: தமிழ்நாட்டில் உள்ள 61 தொழிற்சாலைகளுக்கு அதிரடி நோட்டீஸ்

திருவள்ளூர் அமோனியா கசிவு விபத்தைத் தொடர்ந்து, தமிழகத்தில் உள்ள 61 தொழிற்சாலைகளுக்கு பாதுகாப்பு விதிமீறல்கள் தொடர்பாக நோட்டீஸ் அனுப்பப்பட்டுள்ளது.

திருவள்ளூர் மாவட்டத்தில் உள்ள கடல் உணவு பதப்படுத்தும் தொழிற்சாலையில் கடந்த ஜூன் மாதம் நிகழ்ந்த அமோனியா எரிவாயு கசிவு விபத்து, 18 தொழிலாளர்களின் உயிரைப் பறித்த சோகத்தை ஏற்படுத்தியது. இந்த கோர விபத்தைத் தொடர்ந்து, தொழில்துறை பாதுகாப்பு மற்றும் சுகாதார இயக்ககம் (DISH) தமிழகம் முழுவதும் உள்ள தொழிற்சாலைகளில் தீவிர ஆய்வு மேற்கொள்ள உத்தரவிட்டது. இதன் ஒரு பகுதியாக, ஆகஸ்ட் மாதம் மட்டும் 21 தனிப்படை குழுக்கள் அமைக்கப்பட்டு, அமோனியா பயன்படுத்தும் கடல் உணவு, பால் பண்ணைகள் மற்றும் இதர உணவு பதப்படுத்தும் பிரிவுகள் என மொத்தம் 342 தொழிற்சாலைகளில் அதிரடி ஆய்வுகள் நடத்தப்பட்டன.

இந்த விரிவான ஆய்வின் முடிவில், 61 தொழிற்சாலைகள் அரசின் பாதுகாப்பு விதிமுறைகளை மீறியது கண்டறியப்பட்டுள்ளது. குறிப்பாக, 1948-ஆம் ஆண்டின் தொழிற்சாலைகள் சட்டம் மற்றும் 1950-ஆம் ஆண்டின் தமிழ்நாடு தொழிற்சாலைகள் விதிகளின்படி, அபாயகரமான ரசாயனங்கள் கையாளப்படும் இடங்களுக்கு அருகிலேயே தொழிலாளர்களைத் தங்க வைக்கக்கூடாது என்பது மிக முக்கியமான விதியாகும். ஆனால், ஆய்வு செய்யப்பட்ட பல நிறுவனங்களில் தொழிலாளர்களின் தங்குமிடம் தொழிற்சாலை வளாகத்திற்குள்ளேயே இருந்தது பெரும் குறையாகச் சுட்டிக்காட்டப்பட்டுள்ளது. பாதுகாப்பு விதிகளின்படி, இத்தகைய தொழிற்சாலைகளில் இருந்து தங்குமிடங்கள் குறைந்தது 300 மீட்டர் தொலைவில் இருக்க வேண்டும் என்பது குறிப்பிடத்தக்கது.

பாதுகாப்பு விதிமீறல்களில் ஈடுபட்டதாக கண்டறியப்பட்ட 61 தொழிற்சாலைகளுக்கும் உடனடியாக நோட்டீஸ் அனுப்பப்பட்டு, நிர்ணயிக்கப்பட்ட காலத்திற்குள் குறைபாடுகளைச் சரிசெய்ய உத்தரவிடப்பட்டுள்ளது. பெரும்பாலான நிறுவனங்கள் இந்த உத்தரவை ஏற்று பணிகளைத் தொடங்கியுள்ள நிலையில், சில நிறுவனங்கள் கூடுதல் கால அவகாசம் கேட்டு விண்ணப்பித்துள்ளன. இருப்பினும், கடல் உணவு பதப்படுத்தும் தொழிற்சாலைகள் தரப்பிலிருந்து மாற்றுக்கருத்துக்கள் முன்வைக்கப்பட்டுள்ளன. தொழிலாளர்கள் வளாகத்திற்கு வெளியே தங்குவது, உணவுப் பொருட்களின் தரம் மற்றும் சுகாதாரத்தைப் பேணுவதில் சிரமத்தை ஏற்படுத்தும் என்று அந்தத் தொழிற்சாலைகள் கவலை தெரிவித்துள்ளன.

இந்தச் சிக்கலுக்குத் தீர்வு காணும் வகையில், தொழிலாளர் நலத்துறை சார்பில் சிறப்பு உயர்மட்டக் குழு ஒன்று அமைக்கப்பட்டுள்ளது. இக்குழுவில் தீயணைப்புத்துறை, தமிழ்நாடு மாசுக்கட்டுப்பாட்டு வாரியம், அண்ணா பல்கலைக்கழக நிபுணர்கள் மற்றும் தொழில் துறை பிரதிநிதிகள் இடம்பெற்றுள்ளனர். தொழிலாளர்களின் பாதுகாப்பு மற்றும் உணவுப் பொருட்களின் தரம் ஆகிய இரண்டையும் கருத்தில் கொண்டு, தங்குமிடங்களை இடமாற்றம் செய்வதால் ஏற்படும் நன்மைகள் மற்றும் சவால்கள் குறித்து இந்தக் குழு ஆய்வு செய்யும். ஒரு மாதத்திற்குள் இந்தக் குழு தனது பரிந்துரைகளை அரசுக்கு சமர்ப்பிக்கும் என்றும், அதன் அடிப்படையில் அடுத்தகட்ட நடவடிக்கைகள் எடுக்கப்படும் என்றும் தொழிலாளர் நலத்துறை வட்டாரங்கள் தெரிவித்துள்ளன.