தூத்துக்குடியில் நகைக்காக அத்தை கொலை: மருமகன் கைது - சட்டம் ஒழுங்கு குறித்து ஸ்டாலின் விமர்சனம்

தூத்துக்குடியில் நகைக்காக அத்தை படுகொலை செய்யப்பட்ட சம்பவத்தில் மருமகன் கைது செய்யப்பட்டுள்ளார்.

தூத்துக்குடி கந்தன் காலனி பகுதியில் வசித்து வந்த 45 வயது மதிக்கத்தக்க சி. சசிகலா என்ற பெண், மர்மமான முறையில் கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. இவர் தனது கணவர் சித்திரவேல் கேரளாவுக்கு வேலைக்குச் சென்றிருந்த நிலையில், வீட்டில் தனியாக வசித்து வந்துள்ளார். இவருடைய மகன் நிரஞ்சன் அருகில் உள்ள பகுதியில் தனது குடும்பத்துடன் வசித்து வரும் நிலையில், கடந்த புதன்கிழமை மதியம் தாயின் அலறல் சத்தத்தைக் கேட்டு வீட்டிற்குள் விரைந்து சென்றுள்ளார். அங்கே தனது தாய் ரத்த வெள்ளத்தில் பலத்த காயங்களுடன் உயிருக்குப் போராடிக்கொண்டிருப்பதை கண்டு அதிர்ச்சியடைந்துள்ளார்.

சம்பவ இடத்திற்கு சென்ற காவல் துறையினர், சசிகலாவின் தோள்பட்டை மற்றும் தலையில் கத்திக்குத்து காயங்கள் இருந்ததை உறுதிப்படுத்தினர். மேலும், அவர் அணிந்திருந்த நான்கு பவுன் தங்க நகைகள் மற்றும் அவருடைய கைபேசி கொள்ளையடிக்கப்பட்டிருப்பது விசாரணையில் தெரியவந்தது. இந்த சம்பவம் குறித்து மாவட்ட காவல் கண்காணிப்பாளர் பி. சிவபிரசாத் தலைமையில் தனிப்படை அமைக்கப்பட்டு விசாரணை தீவிரப்படுத்தப்பட்டது. முதற்கட்ட விசாரணையின் அடிப்படையில், சசிகலாவின் மருமகனான விக்னேஷ் என்கிற முனீஷ் (25) என்பவரை காவல் துறையினர் கைது செய்தனர்.

குற்றம் நடந்த மூன்று மணி நேரத்திற்குள்ளாகவே காவல்துறையினர் கொலையாளியை பிடித்து, கொள்ளையடிக்கப்பட்ட நகைகளையும் கைபேசியையும் மீட்டனர். தூத்துக்குடி மாவட்டத்தில் கடந்த ஒரு வார காலத்திற்குள் நடக்கும் எட்டாவது கொலை சம்பவம் இதுவாகும். இது குறித்து செய்தியாளர்களிடம் பேசிய காவல் கண்காணிப்பாளர் பி. சிவபிரசாத், கைது செய்யப்பட்ட குற்றவாளிகளுக்கு முன்னதாக எந்தவித குற்றப் பின்னணியும் இல்லை என்றும், தனிப்பட்ட பகை மற்றும் இதர காரணங்களால் இந்த கொலைகள் நடப்பதாகவும் விளக்கமளித்தார். பொதுமக்களின் பாதுகாப்பை உறுதி செய்யத் தேவையான நடவடிக்கைகள் எடுக்கப்பட்டு வருவதாகவும் அவர் தெரிவித்தார்.

இதற்கிடையில், இச்சம்பவம் தொடர்பாக தி.மு.க தலைவர் மு.க. ஸ்டாலின் சமூக வலைதளத்தில் கடும் கண்டனத்தைப் பதிவு செய்துள்ளார். வெளியில் செல்லும்போது மட்டுமல்லாமல், சொந்த வீட்டிற்குள்ளேயே மக்கள் பாதுகாப்பாக இருக்க முடியாத சூழல் நிலவுவதாக அவர் விமர்சித்துள்ளார். இத்தகைய சட்டம் ஒழுங்கு சீர்குலைவிற்கு தற்போதைய ஆட்சியே பொறுப்பு என்றும், மக்களைப் பாதுகாப்பற்ற சூழலில் தள்ளியதே அரசு செய்த சாதனை என்றும் அவர் தனது பதிவில் குறிப்பிட்டுள்ளார்.