தூத்துக்குடி இந்தி பெயர் பலகை சர்ச்சை: அதிகாரிகளின் சஸ்பெண்ட் நடவடிக்கையை ரத்து செய்யக் கோரிக்கை

தூத்துக்குடியில் இந்தி பெயர் பலகை விவகாரத்தில் நெடுஞ்சாலைத்துறை அதிகாரிகள் மீதான பணிநீக்க நடவடிக்கையை ரத்து செய்ய தமிழ்நாடு நெடுஞ்சாலைத்துறை பட்டயப் பொறியாளர்கள் சங்கம் கோரிக்கை விடுத்துள்ளது.

தூத்துக்குடி மாவட்டம் சாத்தான்குளம் அருகே உள்ள மாநில நெடுஞ்சாலை 93-ல் (SH-93) வைக்கப்பட்ட பெயர் பலகையில் இந்தி மொழியில் பெயர்கள் இடம் பெற்றிருந்தது பெரும் சர்ச்சையை ஏற்படுத்தியது. இது தொடர்பாக தமிழ்நாடு நெடுஞ்சாலைத்துறை பட்டயப் பொறியாளர்கள் சங்கம் அரசுக்கு முக்கிய கோரிக்கை ஒன்றை விடுத்துள்ளது. இந்த விவகாரத்தில் முறையான விசாரணை இன்றி பணியிடை நீக்கம் செய்யப்பட்ட இரண்டு அதிகாரிகளின் நடவடிக்கையை உடனடியாக ரத்து செய்ய வேண்டும் என்று அச்சங்கம் வலியுறுத்தியுள்ளது.

இது குறித்து அச்சங்கத்தின் மாநில பொதுச்செயலாளர் எம். மாரிமுத்து தெரிவிக்கையில், மத்திய சாலை கட்டமைப்பு நிதி (CRIF) திட்டத்தின் கீழ் 2025-26 நிதியாண்டில் சுமார் 4.56 கோடி ரூபாய் மதிப்பீட்டில் இந்த சாலை மேம்படுத்தப்பட்டதாகக் குறிப்பிட்டுள்ளார். இந்தத் திட்டத்தின் கீழ் அமைக்கப்படும் பெயர் பலகைகளில் எந்தெந்த மொழிகள் இடம்பெற வேண்டும் என்பது குறித்த தெளிவான வழிகாட்டுதல்களையோ அல்லது அரசாணையையோ தமிழக அரசு இதுவரை வெளியிடவில்லை என்று அவர் சுட்டிக்காட்டியுள்ளார்.

அதிகாரிகள் வேண்டுமென்றே இந்தி மொழியைப் பயன்படுத்தியதாக ஒரு தவறான பிம்பம் உருவாக்கப்பட்டுள்ளதாகக் கவலை தெரிவித்துள்ள அவர், எவ்வித முன்னறிவிப்பும் இன்றி அல்லது உரிய விசாரணை நடத்தப்படாமல் அதிகாரிகள் மீது நடவடிக்கை எடுத்திருப்பது ஏற்புடையதல்ல என்று கூறியுள்ளார். எத்தனை மொழிகளில் பெயர்களை எழுத வேண்டும் என்பது குறித்து அரசு இன்னும் தெளிவுபடுத்தாத நிலையில், அதிகாரிகள் மீது பழிவாங்கும் நோக்கில் இந்த நடவடிக்கை எடுக்கப்பட்டுள்ளதாகக் குற்றச்சாட்டு எழுந்துள்ளது.

அரசின் விதிமுறைகளை மீறி செயல்பட்டிருந்தால் மட்டுமே நடவடிக்கை எடுக்கப்பட வேண்டும் என்றும், தற்போதுள்ள நடைமுறைகளின்படி சம்பந்தப்பட்ட அதிகாரிகளிடம் உரிய விளக்கம் கேட்டு முறையான விசாரணை நடத்தப்பட வேண்டும் என்றும் சங்கம் கோரியுள்ளது. மாநில நெடுஞ்சாலைகளில் மத்திய அரசின் நிதியைப் பயன்படுத்தும்போது பின்பற்ற வேண்டிய மொழிக் கொள்கை குறித்த தெளிவான உத்தரவுகளை அரசு விரைந்து வெளியிட வேண்டும் என்றும், அதுவரை இடைநீக்கம் செய்யப்பட்ட அதிகாரிகளுக்கு எதிரான நடவடிக்கையைத் திரும்பப் பெற வேண்டும் என்றும் அவர்கள் வலியுறுத்தியுள்ளனர்.