தூத்துக்குடியில் பரபரப்பு: உடல் தோற்றம் குறித்து கிண்டல் செய்த சக தொழிலாளியை கோடரியால் வெட்டிக்கொலை செய்த நபர் கைது

தூத்துக்குடி மாவட்டம் திட்டங்குளம் காய்கறி சந்தையில் சக தொழிலாளியை கோடரியால் வெட்டிக்கொலை செய்த நபர் காவல் நிலையத்தில் சரணடைந்தார்.

தூத்துக்குடி மாவட்டம், திட்டங்குளம் பகுதியில் அமைந்துள்ள பெருந்தலைவர் மொத்த காய்கறி சந்தையில் பயங்கரமான கொலைச் சம்பவம் ஒன்று அரங்கேறியுள்ளது. இந்தச் சம்பவத்தில் 42 வயதுடைய காளிராஜ் என்ற சுமை தூக்கும் தொழிலாளி, சக தொழிலாளி ஒருவரால் கோடரியால் தாக்கப்பட்டு சம்பவ இடத்திலேயே உயிரிழந்துள்ளார். இந்தச் சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.

கொலை செய்யப்பட்ட காளிராஜ், கோவில்பட்டிக்கு அருகிலுள்ள சங்கரலிங்கபுரத்தைச் சேர்ந்தவர் என்று காவல்துறை விசாரணையில் தெரியவந்துள்ளது. இவருடன் அதே சந்தையில் பணியாற்றி வந்த அஞ்சூராம்பட்டியைச் சேர்ந்த சின்னத்துரை (40) என்பவருக்கும் இடையே நீண்டகாலமாக கருத்து வேறுபாடுகள் இருந்து வந்துள்ளது. காளிராஜ் அடிக்கடி சின்னத்துரையின் உடல் தோற்றம் குறித்து கிண்டல் செய்து வந்ததாகவும், இதனால் இருவருக்கும் இடையே அடிக்கடி வாக்குவாதங்களும் மோதல்களும் ஏற்பட்டு வந்ததாகவும் விசாரணையில் தெரியவந்துள்ளது.

முன்னதாக, ஒருமுறை பொது இடத்தில் நடைபெற்ற மோதலின் போது, சின்னத்துரை கீழே விழுந்து அவமானப்பட்டதாகக் கூறப்படுகிறது. இந்த வன்மம் சின்னத்துரைக்கு இருந்த நிலையில், செவ்வாய்க்கிழமை அதிகாலை நேரத்தில் தனது பழிவாங்கலை அரங்கேற்ற முடிவெடுத்தார். காய்கறி கடை ஒன்றில் காளிராஜ் உறங்கிக் கொண்டிருந்த சமயத்தைப் பயன்படுத்திக் கொண்ட சின்னத்துரை, அங்கிருந்த கோடரியை எடுத்து அவரை சரமாரியாகத் தாக்கியுள்ளார். இதில் பலத்த காயமடைந்த காளிராஜ் சம்பவ இடத்திலேயே உயிரிழந்தார்.

சம்பவம் குறித்து தகவல் அறிந்த கோவில்பட்டி கிழக்கு காவல் துறையினர், உயிரிழந்த காளிராஜின் உடலைக் கைப்பற்றி பிரேத பரிசோதனைக்காக கோவில்பட்டி அரசு மருத்துவமனைக்கு அனுப்பி வைத்தனர். கொலையைச் செய்த சின்னத்துரை, சம்பவத்திற்குப் பிறகு நேராக கொப்பம்பட்டி காவல் நிலையத்திற்குச் சென்று சரணடைந்தார். தற்போது அவர் மீது கொலை வழக்கு பதிவு செய்யப்பட்டு, விசாரணை நடைபெற்று வருகிறது. இந்தச் சம்பவம் அந்தச் சந்தையில் பணியாற்றும் தொழிலாளர்கள் மற்றும் வியாபாரிகள் மத்தியில் மிகுந்த சோகத்தை ஏற்படுத்தியுள்ளது.