தூத்துக்குடி விளையாட்டு மைதானத்தில் தடகளப் பாதை விரிவாக்கம்: ஹாக்கி மைதானத்தின் அளவு குறைந்ததாக வீரர்கள் புகார்

தூத்துக்குடி மாவட்ட விளையாட்டு மைதானத்தில் தடகளப் பாதை விரிவாக்கத்தால் ஹாக்கி மைதானத்தின் அளவு குறைந்துள்ளதாக வீரர்கள் கவலை தெரிவித்துள்ளனர்.

தூத்துக்குடி ஜார்ஜ் சாலையில் அமைந்துள்ள மாவட்ட விளையாட்டு மேம்பாட்டு ஆணையத்திற்குச் சொந்தமான தருவை மைதானத்தில், தற்பொழுது மேற்கொள்ளப்பட்டு வரும் சீரமைப்புப் பணிகள் ஹாக்கி வீரர்கள் மத்தியில் அதிருப்தியை ஏற்படுத்தியுள்ளது. சுமார் நான்கு கோடி ரூபாய் மதிப்பீட்டில் நடைபெற்று வரும் இந்த மைதான மேம்பாட்டுத் திட்டத்தில், மழைக்காலங்களில் தண்ணீர் தேங்குவதைத் தவிர்க்கும் நோக்கில் மைதானத்தின் தரைமட்டத்தை இரண்டு அடி உயர்த்தும் பணிகள் மேற்கொள்ளப்பட்டு வருகின்றன. இதற்காக சாம்பல், சரல் மற்றும் செம்மண் போன்ற பொருட்கள் பயன்படுத்தப்பட்டு தரைப்பகுதி சமப்படுத்தப்பட்டு வருகிறது.

இந்தத் திட்டத்தின் ஒரு பகுதியாக, தடகள வீரர்களுக்கான ஓடுதளப் பாதை விரிவாக்கம் செய்யப்பட்டுள்ளது. இந்த விரிவாக்கப் பணி காரணமாக, ஏற்கனவே இருந்த ஹாக்கி மைதானத்தின் பரப்பளவு கணிசமாகக் குறைந்துள்ளதாக வீரர்கள் மற்றும் பயிற்சியாளர்கள் குற்றம் சாட்டியுள்ளனர். சர்வதேச ஹாக்கி கூட்டமைப்பின் தரநிலைப்படி, ஒரு ஹாக்கி மைதானம் 91.40 மீட்டர் நீளமும் 55 மீட்டர் அகலமும் கொண்டிருக்க வேண்டும். ஆனால், தற்போது மேற்கொள்ளப்பட்டுள்ள மாற்றங்களால் இந்த மைதானத்தின் அகலம் 55 மீட்டரில் இருந்து 49 மீட்டராகக் குறைந்துள்ளதாக ஹாக்கி பயிற்சியாளர் சிவ சூரியன் தெரிவித்துள்ளார்.

முறையான தரத்தில் இல்லாத மைதானத்தில் விளையாடுவது வீரர்களின் திறனைப் பாதிக்கும் என்றும், இந்த மைதானத்தில் இனி மாவட்ட அல்லது மாநில அளவிலான போட்டிகளை நடத்துவது சாத்தியமற்றது என்றும் வீரர்கள் சுட்டிக்காட்டுகின்றனர். விளையாட்டுத் துறை அதிகாரிகள் ஹாக்கி விளையாட்டின் முக்கியத்துவத்தை உணர்ந்து, இந்தச் சிக்கலை உடனடியாகச் சரிசெய்ய வேண்டும் என்று அவர்கள் வலியுறுத்துகின்றனர். அத்துடன், சாதாரண புல்வெளி மைதானத்திற்குப் பதிலாக, தமிழக அரசு செயற்கை இழை (Synthetic) கொண்ட ஹாக்கி மைதானத்தை அமைத்துக் கொடுக்க வேண்டும் என்ற நீண்டகால கோரிக்கையையும் அவர்கள் முன்வைத்துள்ளனர்.

இந்த விவகாரம் குறித்து கருத்து தெரிவித்த மாவட்ட விளையாட்டுத் துறை அதிகாரி ரத்னராஜ், தடகளப் பாதையை செயற்கை இழை ஓடுதளமாக மாற்றும் நோக்கில் விரிவாக்கம் செய்யப்பட்டதே மைதானத்தின் அளவு குறையக் காரணமாக அமைந்ததாக ஒப்புக்கொண்டார். தற்போதைய சூழலில் ஹாக்கி வீரர்களின் புகாரைத் தான் உயர் அதிகாரிகளின் கவனத்திற்குக் கொண்டு செல்வதாகவும், இது குறித்து உரிய ஆய்வு செய்யப்பட்டு பிழைகள் சரிசெய்யப்படும் என்றும் அவர் உறுதியளித்துள்ளார்.