தூத்துக்குடியில் சக மாணவரை சித்திரவதை செய்த 9 மாணவர்கள் மீது போக்ஸோ சட்டத்தில் வழக்குப்பதிவு

தூத்துக்குடியில் சக மாணவரை பாலியல் வன்கொடுமை செய்த விவகாரத்தில் 9 மாணவர்கள் மீது போக்ஸோ சட்டத்தின் கீழ் வழக்குப் பதிவு செய்யப்பட்டுள்ளது.

தூத்துக்குடி மாவட்டம் விளாத்திகுளம் பகுதியில் உள்ள ஒரு அரசு மேல்நிலைப்பள்ளியில் எட்டாம் வகுப்பு பயிலும் சக மாணவர் ஒருவரை, அதே வகுப்பைச் சேர்ந்த ஒன்பது மாணவர்கள் பாலியல் ரீதியாக சித்திரவதை செய்த கொடூர சம்பவம் அதிர்ச்சியை ஏற்படுத்தியுள்ளது. கடந்த ஆகஸ்ட் 18-ஆம் தேதி வகுப்பறையில் ஆசிரியர் இல்லாத நேரத்தில் இந்தச் சம்பவம் நிகழ்ந்துள்ளது. பாதிக்கப்பட்ட மாணவனைச் சுற்றி வளைத்த அந்த ஒன்பது மாணவர்களும், அவரை ஆபாசமாகச் சித்தரித்ததோடு, வலுக்கட்டாயமாக அவரது ஆடைகளைக் களைந்து, பிறப்புறுப்புகளில் சித்திரவதை செய்துள்ளனர். மேலும், அவரது உடல் மீது மிளகாய்ப் பொடியைத் தூவி கொடூரமாக நடந்து கொண்டதாகக் கூறப்படுகிறது.

பாதிக்கப்பட்ட மாணவன் மிகுந்த மன உளைச்சலுக்கு ஆளானதைத் தொடர்ந்து, அவரது பெற்றோர் இது குறித்து சம்பந்தப்பட்ட வகுப்பு ஆசிரியரிடம் புகார் அளித்தனர். ஆசிரியர்கள் மற்றும் பள்ளி நிர்வாகம் தரப்பில் முறையான நடவடிக்கை எடுக்கத் தயங்கிய நிலையில், பாதிக்கப்பட்ட மாணவனின் பெற்றோர் விளாத்திகுளம் அனைத்து மகளிர் காவல் நிலையத்தில் புகார் அளித்தனர். புகாரின் அடிப்படையில், பாரதிய நியாய சன்ஹிதா (BNS) மற்றும் போக்சோ (POCSO) சட்டத்தின் பல்வேறு பிரிவுகளின் கீழ் காவல்துறை வழக்குப் பதிவு செய்து விசாரணை மேற்கொண்டது.

இந்த வழக்கில் தொடர்புடைய 13 வயதுடைய ஒன்பது மாணவர்களும் உடனடியாகக் கைது செய்யப்பட்டு, அவர்கள் மீது சட்டப்பூர்வ நடவடிக்கைகள் எடுக்கப்பட்டன. புதன்கிழமை இரவு, அவர்கள் அனைவரும் திருநெல்வேலியில் உள்ள சீர்திருத்தப் பள்ளிக்கு (Borstal School) மாற்றப்பட்டனர். இந்த மாணவர்கள் அனைவரும் சிறார் நீதி வாரியத்தின் முன் ஆஜர்படுத்தப்பட்டனர். தொடர்ந்து நடத்தப்பட்ட விசாரணையில், பாதிக்கப்பட்ட மாணவனை அந்த ஒன்பது பேரும் பல நாட்களாகவே கேலி செய்தும், மிரட்டியும் வந்திருப்பது தெரிய வந்துள்ளது.

இந்த விவகாரம் குறித்து கருத்து தெரிவித்த முதன்மைக் கல்வி அதிகாரி, பள்ளியில் உள்ள ஆசிரியர்களிடம் முதற்கட்ட விசாரணை நடத்தப்பட்டு வருவதாகவும், அவர்கள் மீது உரிய விளக்கம் கேட்டு நோட்டீஸ் அனுப்பப்பட்டுள்ளதாகவும் தெரிவித்தார். பாதிக்கப்பட்ட மாணவருக்கு குழந்தைகள் நலத்துறை, சுகாதாரத்துறை மற்றும் காவல்துறையினரின் முன்னிலையில் கூட்டு ஆலோசனைகள் (Joint Counselling) வழங்கப்பட்டுள்ளன. பள்ளி வளாகத்திற்குள் சக மாணவர்களே இத்தகைய கொடூரச் செயலில் ஈடுபட்டது பெற்றோர் மற்றும் கல்வித்துறை மத்தியில் பெரும் அதிர்ச்சியை ஏற்படுத்தியுள்ளது.