தனுஷ்கோடி கடற்கரையில் கொட்டிய ஆயிரக்கணக்கான நீல நிற ஜெல்லி மீன்கள்: இது இயற்கையான நிகழ்வா?

ராமநாதபுரம் கடற்கரைப் பகுதிகளில் ஆயிரக்கணக்கான நீல நிற ஜெல்லி மீன்கள் கரை ஒதுங்கியது பொதுமக்களிடையே வியப்பை ஏற்படுத்தியுள்ளது.

ராமநாதபுரம் மாவட்டத்தில் உள்ள முகுந்தராயர் சத்திரம் முதல் தனுஷ்கோடி வரையிலான நீண்ட கடற்கரைப் பகுதிகளில், ஆயிரக்கணக்கான நீல நிற ஜெல்லி மீன்கள் கரை ஒதுங்கியுள்ளன. கடலோரத்தில் சிதறிக் கிடந்த இந்த விசித்திரமான நீல நிறப் பொருட்கள், பார்ப்பதற்கு சிறிய பட்டன்கள் போல காட்சியளித்ததால், அப்பகுதிக்கு வந்த சுற்றுலாப் பயணிகள் மற்றும் பொதுமக்கள் பெரும் வியப்புடன் இதைக் கவனித்தனர். இது குறித்து தகவல் அறிந்ததும் அப்பகுதி மக்கள் கடற்கரைக்கு விரைந்து வந்து ஆச்சரியத்துடன் இந்த கடல் உயிரினங்களைப் பார்வையிட்டனர்.

இந்த நிகழ்வு குறித்து மத்திய கடல்சார் மீன்வள ஆராய்ச்சி நிறுவனத்தின் (ICAR-CMFRI) மண்டபம் பிரிவு விஞ்ஞானிகள் விளக்கம் அளித்துள்ளனர். அதன்படி, கரை ஒதுங்கியுள்ள இந்த உயிரினங்கள் Porpita porpita என்ற அறிவியல் பெயர் கொண்ட 'ப்ளூ பட்டன் ஜெல்லி மீன்கள்' (Blue button jellyfish) என்று கண்டறியப்பட்டுள்ளது. இவை பொதுவாக மன்னார் வளைகுடா மற்றும் பாக் வளைகுடா பகுதிகளில் பெருமளவில் காணப்படும் ஹைட்ரோசோவா வகை உயிரினங்கள் ஆகும். கடல் சீற்றமாக இருக்கும் காலங்களிலும், பலமான கடல் காற்று வீசும் நேரங்களிலும் இந்த வகை ஜெல்லி மீன்கள் கரையை நோக்கி அடித்து வரப்படுவது வழக்கமான ஒன்றே என்று ஆய்வாளர்கள் குறிப்பிடுகின்றனர்.

இது தொடர்பாக கருத்து தெரிவித்துள்ள மூத்த விஞ்ஞானி ஒருவர், இதுபோன்ற ஜெல்லி மீன்கள் கரை ஒதுங்குவது என்பது இந்திய கடற்கரை பகுதிகளில் ஆண்டுதோறும் நிகழும் ஒரு இயற்கை நிகழ்வுதான் என்றும், இதில் அச்சப்பட வேண்டியது எதுவும் இல்லை என்றும் தெளிவுபடுத்தியுள்ளார். கடல் நீரோட்டங்கள் மற்றும் காற்றின் திசையைப் பொறுத்து சிறிய வகை கடல் உயிரினங்கள் தற்காலிகமாக கரையில் ஒதுங்குவது இயற்கையான மாற்றமே தவிர, இது கடல் சூழலில் ஏதேனும் ஆபத்தான பாதிப்பு ஏற்பட்டதற்கான அறிகுறி அல்ல என்று உறுதிப்படுத்தப்பட்டுள்ளது. கடந்த 2025-ஆம் ஆண்டு அரியமான் கடற்கரைப் பகுதியிலும் இதேபோன்ற வேறொரு வகை ஜெல்லி மீன்கள் கரை ஒதுங்கியது குறிப்பிடத்தக்கது.

உள்ளூர் மக்களில் ஒருவரான பிரபு என்பவர் கூறுகையில், கடற்கரையில் சிறிய பட்டன் போன்ற பொருட்கள் ஆயிரக்கணக்கில் சிதறிக் கிடப்பதைப் பார்த்து முதலில் ஆச்சரியமடைந்தோம் என்றும், அருகில் சென்று பார்த்தபோதுதான் அவை ஜெல்லி மீன்கள் என்பது தெரியவந்தது என்றும் தெரிவித்துள்ளார். தற்போது கரை ஒதுங்கியுள்ள இந்த ஜெல்லி மீன்கள் ஆபத்தானவை அல்ல என்றாலும், பொதுமக்கள் இவற்றைத் தொடாமல் கவனமாக இருப்பது நல்லது என்று அறிவுறுத்தப்படுகிறது. கடல்சார் நிபுணர்களின் இந்த விளக்கமானது கடற்கரைக்கு வரும் சுற்றுலாப் பயணிகளிடையே நிலவிய குழப்பத்தைப் போக்கியுள்ளது.