வன உரிமைச் சட்டத்தில் முறைகேடு: திருவண்ணாமலை வனப்பகுதியில் லஞ்சம் பெறும் ஊழியர்கள் மீது அதிரடி விசாரணை

வன உரிமைச் சட்டத்தின் கீழ் நில உரிமை கோருவோரிடம் லஞ்சம் வாங்கும் வனத்துறை ஊழியர்கள் மீது நடவடிக்கை எடுக்க உத்தரவிடப்பட்டுள்ளது.

தமிழ்நாட்டில் வன உரிமைச் சட்டத்தின் (FRA) கீழ் நில உரிமை கோரும் பழங்குடியின மக்களிடம் வனத்துறை ஊழியர்கள் லஞ்சம் பெறுவதாகவும், அவர்களை கட்டாய வேலை செய்ய வற்புறுத்துவதாகவும் எழுந்த புகாரைத் தொடர்ந்து, வனத்துறை உயர் அதிகாரிகள் தீவிர விசாரணைக்கு உத்தரவிட்டுள்ளனர். திருவண்ணாமலை வனப்பிரிவில் இத்தகைய முறைகேடுகள் நடப்பதாகக் கண்டறியப்பட்டதை அடுத்து, மாநில முதன்மை தலைமை வனப் பாதுகாவலர் மற்றும் வனப் படைத் தலைவர் ஏ. உதயன் இது குறித்து அனைத்து மண்டல அதிகாரிகளுக்கும் முக்கிய சுற்றறிக்கை ஒன்றை அனுப்பியுள்ளார்.

இந்த சுற்றறிக்கையில், நில எல்லைகளை அளவிடுதல், நிலத்தை ஆய்வு செய்தல் மற்றும் உரிமை கோரும் மனுக்களைப் பரிசீலித்தல் போன்ற பணிகளுக்காக வனத்துறை களப்பணியாளர்கள் 5,000 ரூபாய் முதல் 15,000 ரூபாய் வரை லஞ்சமாகப் பெறுவதாகப் புகார்கள் எழுந்துள்ளன. லஞ்சம் கொடுக்க மறுக்கும் பழங்குடியின மக்களின் விண்ணப்பங்கள் எவ்வித காரணமும் இன்றி நிராகரிக்கப்படுவதும், நில அளவீட்டுப் பணிகள் தடுத்து நிறுத்தப்படுவதும் கண்டறியப்பட்டுள்ளது. இத்தகைய செயல்கள் சட்டத்திற்குப் புறம்பானவை என்று உயர் அதிகாரி கடுமையாக எச்சரித்துள்ளார்.

லஞ்சம் மட்டுமின்றி, பழங்குடியின மக்களைக் கட்டாய வேலைகளில் ஈடுபடுத்தும் கொடுமையும் திருவண்ணாமலை வனப்பிரிவில் நடைபெறுவதாகத் தகவல்கள் தெரிவிக்கின்றன. வன உரிமைச் சட்டத்தின் கீழ் விண்ணப்பித்துள்ளவர்களிடம், அவர்களின் விண்ணப்பங்கள் நிராகரிக்கப்படும் என்று மிரட்டி, தீ தடுப்புப் பாதைகளைச் சுத்தம் செய்வது மற்றும் மரக்கன்றுகளுக்கு மூங்கில் பாதுகாப்பு வேலிகளை அமைப்பது போன்ற பணிகளை ஊதியமின்றிச் செய்ய வைப்பதாகக் கூறப்படுகிறது. இவ்வாறு பணியாற்றும் பழங்குடியினருக்கான ஊதியத்தை வனத்துறை ஊழியர்களே கையாடல் செய்துவிடுவதாகவும் தெரியவந்துள்ளது.

இந்த முறைகேடுகளைத் தடுக்க, அந்தந்தப் பகுதிகளில் உள்ள தலைமை வனப் பாதுகாவலர்கள் மற்றும் வனப் பாதுகாவலர்கள் நேரடியாக கள ஆய்வு மேற்கொள்ள வேண்டும் என்று அறிவுறுத்தப்பட்டுள்ளது. காடுகள் மற்றும் வன உரிமைச் சட்டத்தை முறையாகச் செயல்படுத்தும் அதே வேளையில், களப்பணியாளர்களின் நடவடிக்கைகளைத் தீவிரமாகக் கண்காணிக்க வேண்டும் என்றும், லஞ்சம் அல்லது கட்டாய உழைப்பில் ஈடுபடும் ஊழியர்கள் மீது குற்றவியல் நடவடிக்கை மற்றும் துறைரீதியான ஒழுங்கு நடவடிக்கைகளை உடனடியாக எடுக்க வேண்டும் என்றும் உத்தரவிடப்பட்டுள்ளது.