ஆஸ்திரேலியாவின் சிறந்த கிரிக்கெட் வீரர் விருது: மீண்டும் சாதனை படைத்த டிராவிஸ் ஹெட்

ஆஸ்திரேலியாவின் சிறந்த கிரிக்கெட் வீரருக்கான ஆலன் பார்டர் விருதை தொடர்ச்சியாக இரண்டாவது முறையாக டிராவிஸ் ஹெட் வென்றுள்ளார்.

ஆஸ்திரேலிய கிரிக்கெட் அணியின் நட்சத்திர தொடக்க ஆட்டக்காரர் டிராவிஸ் ஹெட், அந்த நாட்டின் மிக உயரிய கௌரவமான ஆலன் பார்டர் விருதை மீண்டும் வென்று சாதனை படைத்துள்ளார். 2025-26 ஆம் ஆண்டுக்கான சர்வதேச கிரிக்கெட் சீசனில் அவர் காட்டிய அபாரமான ஆட்டத்திறனுக்காக, தொடர்ந்து இரண்டாவது ஆண்டாக இந்த விருதை அவர் கைப்பற்றியுள்ளார். பிரஸ்பேனில் நடைபெற்ற பிரம்மாண்ட விழாவில், சக வீரர்கள், ஊடகவியலாளர்கள் மற்றும் நடுவர்களின் வாக்குகள் அடிப்படையில் இந்த வெற்றியாளர் தேர்வு செய்யப்பட்டார்.

இந்த விருதைப் பெறுவதற்கான போட்டியில், சக அணி வீரரான விக்கெட் கீப்பர் அலெக்ஸ் கேரியை விட வெறும் ஒரு வாக்கு வித்தியாசத்தில் டிராவிஸ் ஹெட் வெற்றி பெற்றார். அவர் மொத்தம் 153 வாக்குகளைப் பெற்று முதலிடம் பிடித்தார். வேகப்பந்து வீச்சாளர் மிட்செல் ஸ்டார்க் இவருக்கு அடுத்தபடியாக, மூன்றாவது இடத்தில் உள்ளார். கடந்த சீசனில் மூன்று வகை கிரிக்கெட் போட்டிகளிலும் சேர்த்து மொத்தம் 30 போட்டிகளில் விளையாடிய ஹெட், 1,437 ரன்களைக் குவித்து அசத்தினார். குறிப்பாக, பெர்த்தில் நடைபெற்ற இங்கிலாந்துக்கு எதிரான ஆஷஸ் டெஸ்ட் போட்டியில் 83 பந்துகளில் 123 ரன்கள் குவித்தது அவரது ஆட்டத்திறனுக்குச் சான்றாக அமைந்தது.

இந்த வெற்றியின் மூலம், ஆலன் பார்டர் விருதை தொடர்ந்து இரண்டு முறை வென்ற ஐந்தாவது வீரர் என்ற பெருமையை டிராவிஸ் ஹெட் பெற்றுள்ளார். அவருக்கு முன்னதாக ரிக்கி பாண்டிங், மைக்கேல் கிளார்க், டேவிட் வார்னர் மற்றும் ஷேன் வாட்சன் ஆகியோர் மட்டுமே இந்த அரிய சாதனையை நிகழ்த்தியுள்ளனர். தனது இரண்டு பதக்கங்களையும் எதிர்காலத்தில் தனது குழந்தைகளுக்குக் காண்பிப்பேன் என்றும், இந்தத் தருணம் தனக்கு மிகவும் மகிழ்ச்சியளிப்பதாகவும் அவர் நெகிழ்ச்சியுடன் குறிப்பிட்டார்.

இதே விழாவில் மற்ற முக்கிய விருதுகளும் வழங்கப்பட்டன. ஆஸ்திரேலிய டெஸ்ட் அணியின் சிறந்த வீரராக மிட்செல் ஸ்டார்க் தேர்வு செய்யப்பட்டார், இவர் கடந்த சீசனில் 11 டெஸ்ட் போட்டிகளில் விளையாடி 31 விக்கெட்டுகளை வீழ்த்தி தனது சிறப்பான பங்களிப்பை வழங்கியிருந்தார். ஒருநாள் கிரிக்கெட் போட்டிகளுக்கான சிறந்த வீரராக மிட்செல் மார்ஷும், டி20 போட்டிக்கான விருதை டிம் டேவிட்டும் வென்றனர். பெண்களுக்கான சிறந்த கிரிக்கெட் வீராங்கனையாக அனாபெல் சதர்லேண்ட் இரண்டாவது முறையாக பெலிண்டா கிளார்க் விருதை வென்றுள்ளார் என்பது குறிப்பிடத்தக்கது.