திருச்சி அரசு மருத்துவமனை எச்.ஐ.வி பாதிப்பு: பாதிக்கப்பட்ட தாய் மற்றும் சிறுவனுக்கு ரூ. 40 லட்சம் இழப்பீடு வழங்க உத்தரவு

திருச்சி அரசு மருத்துவமனையில் தவறான ரத்த மாற்றத்தால் எச்.ஐ.வி பாதிப்புக்குள்ளான தாய் மற்றும் மகனுக்கு தலா 20 லட்சம் ரூபாய் இழப்பீடு வழங்க தமிழ்நாடு அரசு ஒப்புதல் அளித்துள்ளது.

திருச்சிராப்பள்ளி மகாத்மா காந்தி நினைவு அரசு மருத்துவமனையில் சிகிச்சை பெற்றபோது, தவறான ரத்த மாற்றத்தால் எச்.ஐ.வி தொற்றுக்கு ஆளான தாய் மற்றும் அவரது சிறு வயது மகனுக்கு தலா 20 லட்சம் ரூபாய் இழப்பீடு வழங்க தமிழ்நாடு அரசு முன்வந்துள்ளது. இது தொடர்பான வழக்கு சென்னை உயர் நீதிமன்றத்தின் மதுரை கிளையில் நீதிபதி சி.சரவணன் முன்னிலையில் விசாரணைக்கு வந்தது. பாதிக்கப்பட்ட பெண் தாக்கல் செய்த மனுவை விசாரித்த நீதிமன்றம், இந்த இழப்பீடு தொகையை இரண்டு வார காலத்திற்குள் வழங்க வேண்டும் என்று அரசுக்கு உத்தரவிட்டுள்ளது.

வழக்கின் விவரங்களின்படி, கடந்த 2022 ஆம் ஆண்டு பிரசவத்திற்காக அந்தப் பெண் திருச்சி அரசு மருத்துவமனையில் அனுமதிக்கப்பட்டிருந்தார். அப்போது அவருக்குச் செலுத்தப்பட்ட ரத்தம் மூலம் எச்.ஐ.வி பாதிப்பு அவருக்கு மட்டுமன்றி, அவரது குழந்தைக்கும்கூட பரவியது. இந்தச் சம்பவம் பெரும் அதிர்ச்சியை ஏற்படுத்திய நிலையில், பாதிக்கப்பட்ட பெண் இழப்பீடு கோரி நீதிமன்றத்தை நாடினார். முன்னதாக, நீதிமன்றத்தின் இடைக்கால உத்தரவின்படி 2.5 லட்சம் ரூபாய் நிவாரணமாக வழங்கப்பட்ட நிலையில், மீதமுள்ள தொகையையும் வழங்க அரசு ஒப்புக்கொண்டது.

இந்த வழக்கில் மருத்துவமனை நிர்வாகம் தாக்கல் செய்த பதில் மனுவில், தேசிய ரத்த மாற்று கவுன்சில் மற்றும் தமிழ்நாடு மாநில எய்ட்ஸ் கட்டுப்பாட்டு சங்கத்தின் விதிமுறைகளின்படியே ரத்த பரிசோதனைகள் மேற்கொள்ளப்பட்டதாகக் குறிப்பிடப்பட்டுள்ளது. ரத்த தானம் செய்தவர் எச்.ஐ.வி பாதிப்பின் 'விண்டோ பீரியட்' காலத்தில் இருந்ததால், அப்போது நடத்தப்பட்ட பரிசோதனைகளில் தொற்று இருப்பது கண்டறியப்படவில்லை என்று மருத்துவமனை டீன் விளக்கம் அளித்துள்ளார். பரிசோதனையின்போது தொற்றைக் கண்டறியக்கூடிய எந்தவொரு அறிவியல் பூர்வமான முறையும் அந்த காலகட்டத்தில் இல்லை என்றும், மருத்துவமனை நிர்வாகத்தின் மீது எந்தத் தவறும் இல்லை என்றும் தெரிவிக்கப்பட்டுள்ளது.

நீதிமன்றம் தனது இறுதி உத்தரவில், அரசு வழங்கவுள்ள இந்த 40 லட்சம் ரூபாய் இழப்பீட்டில், தாய்க்கு வழங்கப்பட வேண்டிய 20 லட்சம் ரூபாயை அவரிடம் வழங்கவும், சிறுவனுக்கான 20 லட்சம் ரூபாய் தொகையை தேசியமயமாக்கப்பட்ட வங்கி அல்லது அஞ்சலகத்தில் சிறுவன் வயதுக்கு வரும் வரை நிலையான வைப்பு நிதியாக (Fixed Deposit) முதலீடு செய்யவும் உத்தரவிட்டுள்ளது. பாதிக்கப்பட்டவர்களுக்கு உரிய நிவாரணம் வழங்கப்படுவதை உறுதி செய்த நீதிமன்றம், இந்த வழக்கினை முடித்து வைத்துள்ளது.