நீலகிரி மலைத்தொடரில் கண்டறியப்பட்ட இரண்டு புதிய வகை ஸ்பிரிங்டெயில் உயிரினங்கள்: ஆராய்ச்சியாளர்கள் தகவல்

நீலகிரி மலைப்பகுதியில் ஸ்பிரிங்டெயில் என்ற நுண் உயிரினங்களின் இரண்டு புதிய சிற்றினங்களை ஆராய்ச்சியாளர்கள் கண்டறிந்துள்ளனர்.

மேற்கு தொடர்ச்சி மலையின் ஒரு பகுதியான நீலகிரி மலைத்தொடரில், மண்ணுக்குள் வாழும் மிகச் சிறிய உயிரினங்களான ஸ்பிரிங்டெயில்களின் (Springtails) இரண்டு புதிய சிற்றினங்களை விஞ்ஞானிகள் கண்டறிந்துள்ளனர். இந்த கண்டுபிடிப்பின் மூலம் இந்தியாவில் ஃபோல்சோமியா (Folsomia) பேரினத்தைச் சேர்ந்த அறியப்பட்ட உயிரினங்களின் எண்ணிக்கை 13 ஆக உயர்ந்துள்ளது. குன்னூர் அரசு கலைக் கல்லூரியின் முதல்வர் டாக்டர் ஆர். சனில் தலைமையிலான ஆய்வுக் குழுவினர் இந்த புதிய உயிரினங்களை அடையாளம் கண்டுள்ளனர்.

இந்த ஆய்வானது ஊட்டி அரசு கலைக் கல்லூரியின் மூலக்கூறு பல்லுயிர் ஆய்வகத்தில் (Molecular Biodiversity Lab), முனைவர் பட்ட ஆய்வின் ஒரு பகுதியாக ஜோஸ் அஞ்சூரியா என்பவரால் மேற்கொள்ளப்பட்டது. இவர் தற்போது கோழிக்கோடு மருத்துவக் கல்லூரியின் தாய் மற்றும் சேய் நல நிறுவனத்தில் திட்ட விஞ்ஞானியாகப் பணியாற்றி வருகிறார். இந்த ஆய்வுக் குழுவில் ஸ்பெயின் நாட்டைச் சேர்ந்த ஆராய்ச்சியாளர்கள், இந்திய விலங்கியல் ஆய்வகத்தின் பிரதிநிதிகள் மற்றும் குன்னூர் பிராவிடன்ஸ் கல்லூரியின் விலங்கியல் துறை ஆய்வாளர்களும் இணைந்து பணியாற்றியுள்ளனர்.

ஆராய்ச்சியாளர்கள் 2022 ஆம் ஆண்டு ஏப்ரல் முதல் ஜூன் வரையிலான காலகட்டத்தில் உதகமண்டலம், குன்னூர், குந்தா, கூடலூர் மற்றும் பந்தலூர் ஆகிய பகுதிகளில் உள்ள மண் மற்றும் இலை மக்குகளிலிருந்து மாதிரிகளைச் சேகரித்தனர். சேகரிக்கப்பட்ட மாதிரிகள் நுண்ணோக்கி பரிசோதனை மற்றும் டிஎன்ஏ பார்கோடிங் (DNA barcoding) முறைக்கு உட்படுத்தப்பட்டன. இந்த நவீன அறிவியல் நுட்பங்களின் மூலம் ஃபோல்சோமியா சியேகா (Folsomia ciega) மற்றும் ஃபோல்சோமியா யூனியோகுலேட்டா (Folsomia unioculata) ஆகிய இரண்டு புதிய சிற்றினங்கள் உறுதி செய்யப்பட்டன. இந்த முக்கிய ஆய்வுக் கட்டுரையானது சூடாக்சா (Zootaxa) என்ற புகழ்பெற்ற வகைப்பாட்டியல் இதழில் வெளியிடப்பட்டுள்ளது.

புதிதாக கண்டறியப்பட்ட ஃபோல்சோமியா சியேகா என்பது ஸ்பானிஷ் மொழியில் 'பார்வையற்ற' என்று பொருள்படும். இந்த உயிரினம் கண்களே இல்லாத ஒரு மிகச் சிறிய மற்றும் வெளிறிய நிறத்திலான உயிரினமாகும். இது சுமார் 1 மிமீ நீளம் கொண்டது. இதன் உடல் அமைப்பு, முடிகளின் வரிசை அமைப்பு மற்றும் முக்ரோ (mucro) எனப்படும் இரண்டு முனை கொண்ட வால் போன்ற அமைப்பால் மற்ற உயிரினங்களிலிருந்து வேறுபடுகிறது. மற்றொரு வகையான ஃபோல்சோமியா யூனியோகுலேட்டா என்பது லத்தீன் மொழியில் 'ஒற்றைக் கண்' என்று பொருள்படும். இது தலையின் இரு பக்கங்களிலும் தலா ஒரு கண்ணைக் கொண்டுள்ளது. இது சுமார் 1.3 மிமீ வரை வளரக்கூடியது மற்றும் பல கண்கள் கொண்ட அல்லது கண்கள் இல்லாத மற்ற சிற்றினங்களிலிருந்து தனித்துவமாகத் திகழ்கிறது.