பிஃபா தலைவர் இன்பான்டினோ மீது கிரிமினல் வழக்கு தொடர யுஇஎஃப்ஏ அதிரடி முடிவு

பிஃபா தலைவர் ஜியானி இன்பான்டினோ மீது உலகக்கோப்பை கால்பந்து வருவாய் தொடர்பான முறைகேடு புகாரில் சுவிஸ் நீதிமன்றத்தில் கிரிமினல் வழக்கு தொடர யுஇஎஃப்ஏ திட்டமிட்டுள்ளது.

சர்வதேச கால்பந்து சங்கங்களின் கூட்டமைப்பான பிஃபாவின் தலைவர் ஜியானி இன்பான்டினோ மீது, ஸ்விட்சர்லாந்து நீதிமன்றத்தில் கிரிமினல் வழக்கு தொடர யுஇஎஃப்ஏ எனப்படும் ஐரோப்பிய கால்பந்து சங்கங்களின் கூட்டமைப்பு தீவிரமாக ஆலோசித்து வருகிறது. உலகக்கோப்பை கால்பந்து தொடரின் வருவாயை தனியாருக்கு விற்பனை செய்யும் முயற்சியில் ஈடுபட்டபோது, நிதி முறைகேடுகளில் ஈடுபட்டதாக அவர் மீது குற்றம் சாட்டப்பட்டுள்ளது. குறிப்பாக ஸ்விஸ் தண்டனைச் சட்டத்தின் 158-வது பிரிவின் கீழ், கிரிமினல் ரீதியான நிர்வாகக் குளறுபடிகளை மேற்கொண்டதாக இன்பான்டினோ மற்றும் இதர பிஃபா அதிகாரிகளுக்கு எதிராக நடவடிக்கை எடுக்க யுஇஎஃப்ஏவின் சட்ட வல்லுநர்கள் திட்டமிட்டுள்ளனர்.

இந்த சர்ச்சை தொடர்பாக யுஇஎஃப்ஏ தரப்பில் நியூயார்க் நீதிமன்றத்தில் ஆவணங்கள் தாக்கல் செய்யப்பட்டுள்ளன. இதன்படி, ஜோசுவா குஷ்னர் என்பவரால் தொடங்கப்பட்ட 'த்ரைவ் கேபிடல் மேனேஜ்மென்ட்' நிறுவனத்திடமிருந்து இது தொடர்பான ஆதாரங்களை திரட்ட யுஇஎஃப்ஏ கோரிக்கை விடுத்துள்ளது. பிஃபாவின் வர்த்தக நிகழ்வுகளை நிர்வகிக்கும் துணை நிறுவனம் ஒன்றில் 20 சதவீத பங்குகளை 4.2 பில்லியன் டாலர் மதிப்பிற்கு விற்பனை செய்ய இன்பான்டினோ திட்டமிட்டிருந்தார். இந்த வர்த்தக ஒப்பந்தத்தில் த்ரைவ் கேபிடல் நிறுவனம் முக்கிய முதலீட்டாளராகச் செயல்படவிருந்தது குறிப்பிடத்தக்கது.

யுஇஎஃப்ஏ தாக்கல் செய்த 56 பக்க ஆவணத்தில், இந்த 4.2 பில்லியன் டாலர் என்பது சந்தை மதிப்பற்ற, ஏமாற்று வேலைக்காக இன்பான்டினோவால் நிர்ணயிக்கப்பட்ட விலை என்று கடுமையாக விமர்சிக்கப்பட்டுள்ளது. தனது தனிப்பட்ட லாபத்திற்காக பிஃபாவின் மிக முக்கியமான சொத்துகளைத் தனியாருக்குத் தாரை வார்க்க இன்பான்டினோ முயன்றதாக யுஇஎஃப்ஏ குற்றம் சாட்டுகிறது. இத்தகைய செயல்கள் பிஃபாவின் உறுப்பினர்களுக்கும், கால்பந்து குடும்பத்தைச் சேர்ந்த பிற தரப்பினருக்கும் பெரும் பாதிப்பை ஏற்படுத்தும் என்றும் சட்ட ஆவணங்கள் தெரிவிக்கின்றன.

உலகளாவிய கால்பந்து தலைவர்களிடமிருந்து எழுந்த கடுமையான எதிர்ப்பைத் தொடர்ந்து, கடந்த ஆகஸ்ட் 1-ஆம் தேதி இந்த விற்பனைத் திட்டத்தை இன்பான்டினோ கைவிட்டதாக அறிவித்தார். இருப்பினும், இந்த விவகாரத்தில் உண்மையை வெளிக்கொண்டு வருவதிலும், தொடர்புடைய ஆவணங்களை மறைப்பதைத் தடுப்பதிலும் யுஇஎஃப்ஏ உறுதியாக உள்ளது. பிஃபாவின் மியாமி அலுவலகம் அமைந்துள்ள ஃபுளோரிடாவிலும், வெளிநாட்டு நடவடிக்கைகளின் ஒரு பகுதியாக இது தொடர்பான ஆதாரங்களைக் கைப்பற்ற சட்டப்பூர்வ அனுமதி கோரப்பட்டுள்ளது. கால்பந்து உலகின் உச்சபட்ச அதிகார மையத்தில் ஏற்பட்டுள்ள இந்த கிரிமினல் குற்றச்சாட்டு விளையாட்டு வட்டாரத்தில் பெரும் அதிர்வலைகளை ஏற்படுத்தியுள்ளது.