வல்லநாடு பாலம் சீரமைப்பு: 3.56 கோடியில் நிரந்தர தீர்வு காண தேசிய நெடுஞ்சாலை ஆணையம் திட்டம்

தூத்துக்குடி வல்லநாடு பாலத்தில் ஏற்படும் விரிசல்களை சரிசெய்ய 3.56 கோடி ரூபாய் ஒதுக்கீடு செய்யப்பட்டு, 90 நாட்களில் பணிகள் முடிக்கப்பட உள்ளது.

தூத்துக்குடி மற்றும் திருநெல்வேலி இடையே அமைந்துள்ள வல்லநாடு பாலத்தில் அடிக்கடி ஏற்படும் பள்ளங்கள் மற்றும் விரிசல்களை நிரந்தரமாக சரிசெய்ய தேசிய நெடுஞ்சாலை ஆணையம் (NHAI) நடவடிக்கை எடுத்துள்ளது. இதற்காக 3.56 கோடி ரூபாய் நிதி ஒதுக்கீடு செய்யப்பட்டு, இதற்கான டெண்டர் கோரப்பட்டுள்ளதாக அதிகாரிகள் தெரிவித்துள்ளனர். கடந்த 2013-ம் ஆண்டு கட்டப்பட்ட இந்த பாலம், தூத்துக்குடி - திருநெல்வேலி தேசிய நெடுஞ்சாலை எண் 138-ல் தாமிரபரணி ஆற்றின் குறுக்கே அமைந்துள்ளது. இருப்பினும், கட்டப்பட்ட காலம் முதலே இந்தப் பாலத்தின் மேல்பகுதியில் அடிக்கடி விரிசல்கள் மற்றும் குழிகள் ஏற்படுவது வாகன ஓட்டிகளுக்கு பெரும் சிரமத்தை ஏற்படுத்தி வருகிறது.

பாலத்தின் நிலைத்தன்மை மற்றும் பாதுகாப்பு குறித்து சமூக ஆர்வலர் சுகன் கிறிஸ்டோபர் தாக்கல் செய்த மனுவிற்கு பதில் அளித்துள்ள தேசிய நெடுஞ்சாலை ஆணையத்தின் திட்ட இயக்குனர் கிருஷ்ணேந்திர திவேதி, பாலத்தின் டெக் ஸ்லாப்களில் சிறிய அளவிலான பள்ளங்கள் மற்றும் விரிசல்கள் இருப்பது கண்டறியப்பட்டுள்ளதாகக் குறிப்பிட்டுள்ளார். பயணிகளின் பாதுகாப்பு மற்றும் போக்குவரத்து தடையில்லாமல் செல்வதை உறுதி செய்யும் நோக்கில், தற்போதைய ஒப்பந்ததாரர் மூலம் உடனடியாக தற்காலிக சீரமைப்பு பணிகள் மேற்கொள்ளப்பட்டு வருகின்றன. இருப்பினும், இந்த பிரச்சினைகளுக்கு முற்றுப்புள்ளி வைக்கும் வகையில் மத்திய சாலை போக்குவரத்து மற்றும் நெடுஞ்சாலை அமைச்சகத்தின் வழிகாட்டுதலின்படி நிரந்தர சீரமைப்பு பணிகள் மேற்கொள்ளப்பட உள்ளன.

பாலத்தின் ஒட்டுமொத்தமான 15 ஸ்பேன்களில், ஏழுக்கும் மேற்பட்ட ஸ்பேன்களில் பாதிப்புகள் இருப்பது கண்டறியப்பட்டுள்ளது. இந்த விரிசல்கள் பாலத்தின் மேற்பரப்பில் மட்டுமே இருப்பதால், கட்டுமான ரீதியாக பாலத்தின் வலிமை பாதிக்கப்படவில்லை என்றும் அதிகாரிகள் விளக்கம் அளித்துள்ளனர். நிரந்தர சீரமைப்பு திட்டத்தின் ஒரு பகுதியாக, பாலத்தின் மேல்பகுதியில் உள்ள தேய்மானம் அடைந்த பகுதியை (Wearing course) முற்றிலுமாக அகற்றிவிட்டு புதியதாக அமைக்கும் பணிகள் நடைபெறவுள்ளன. இந்த ஒட்டுமொத்த சீரமைப்பு பணிகளையும் அடுத்த 90 நாட்களுக்குள் முடிக்க திட்டமிடப்பட்டுள்ளது.

கடந்த ஜூலை 2024-ல், இந்திய தொழில்நுட்பக் கழகம் (IIT) மற்றும் மத்திய சாலை ஆராய்ச்சி நிறுவனம் (CRRI) ஆகியவற்றின் நிபுணர்கள் குழுவின் ஆலோசனையின் பேரில், வல்லநாடு பாலத்தில் ஏற்கனவே பெரிய அளவிலான சீரமைப்பு பணிகள் மேற்கொள்ளப்பட்டன. பல கோடி ரூபாய் செலவில் சீரமைப்பு பணிகள் நடந்த போதிலும், மீண்டும் மீண்டும் பாதிப்புகள் ஏற்படுவது பொதுமக்களிடையே பாலத்தின் தரம் குறித்த கேள்விகளை எழுப்பியுள்ளது. இதனால், இந்த முறை மேற்கொள்ளப்படும் நிரந்தரப் பணிகள் தரமானதாக இருக்கும் என்று எதிர்பார்க்கப்படுகிறது. இப்பணிகள் முடியும் வரை தற்காலிக சீரமைப்பு நடவடிக்கைகள் தொடர்ந்து மேற்கொள்ளப்படும் என்றும் நெடுஞ்சாலைத் துறை உறுதி அளித்துள்ளது.