வேலூர்: ஆட்டிசம் பாதித்த இளைஞர்களுக்கு வாழ்வாதாரம் அளிக்கும் 'மேட் பை ஸ்பெஷல் ஹேண்ட்ஸ்' முயற்சி

வேலூர் மாவட்டத்தில் ஆட்டிசம் பாதித்த இளைஞர்களின் வாழ்வாதாரத்தை மேம்படுத்த 'மேட் பை ஸ்பெஷல் ஹேண்ட்ஸ்' என்ற புதுமையான முயற்சி தொடங்கப்பட்டுள்ளது.

வேலூர் மாவட்டம் சாத்துவாச்சாரியில் ஆட்டிசம் பாதித்த இளைஞர்களின் படைப்பாற்றலை வெளிப்படுத்தும் விதமாகவும், அவர்களுக்குத் தன்னம்பிக்கை அளிக்கும் வகையிலும் 'மேட் பை ஸ்பெஷல் ஹேண்ட்ஸ்' (Made by Special Hands) என்ற விற்பனையகம் தொடங்கப்பட்டுள்ளது. மரத்தினால் ஆன தலைமுடிக்காகப் பயன்படுத்தும் கிளிப்புகள், கையால் செய்யப்பட்ட காதணிகள், ஓவியங்கள், மற்றும் சணல் பைகள் என பல்வேறு விதமான பொருட்கள் இங்கு விற்பனைக்கு வைக்கப்பட்டுள்ளன. இந்த முயற்சி, பெற்றோருக்குப் பிறகு ஆட்டிசம் பாதித்தவர்களின் எதிர்காலம் மற்றும் அவர்களின் வாழ்வாதாரம் குறித்த சமூகத்தின் முக்கியக் கவலையை நிவர்த்தி செய்யும் வகையில் உருவாக்கப்பட்டுள்ளது.

இந்த அமைப்பைச் சார்ந்த டே ஆக்டிவிட்டி சென்டர் (DAC) மற்றும் ஆனைக்கட்டில் உள்ள ஆட்டிசம் ரெசிடென்ஷியல் கம்யூனிட்டி ஆகியவை இணைந்து, இவர்களுக்குத் தேவையான பயிற்சிகளை நிபுணர்கள் மூலம் வழங்கி வருகின்றன. இதன் நிறுவனரான பிரதீப் ஜெயதிலக் கூறுகையில், ஆட்டிசம் என்பது மனநோய் அல்ல, அது ஒரு வளர்ச்சி சார்ந்த குறைபாடு மட்டுமே என்று விளக்குகிறார். ஒவ்வொரு ஆட்டிசம் பாதித்தவருக்கும் வாழ்நாள் முழுவதும் ஆதரவு தேவைப்படுகிறது. பெற்றோர்கள் இல்லாத காலத்திலும் இவர்கள் சுயசார்புடன் வாழ்வதே இந்த அமைப்பின் முதன்மை நோக்கமாகும் என்று அவர் குறிப்பிடுகிறார்.

இந்தியாவில் ஆட்டிசம் பாதிப்பு குறித்த முறையான தேசிய அளவிலான தரவுகள் இல்லாதது பெரும் சவாலாக உள்ளது. இருப்பினும், ஆய்வுகளின்படி இந்தியாவில் 2 முதல் 9 வயதுக்குட்பட்டவர்களில் 68 குழந்தைகளில் ஒருவர் ஆட்டிசம் பாதிப்புக்கு உள்ளாகியிருப்பது கண்டறியப்பட்டுள்ளது. அரசின் நலத்திட்டங்களைச் செயல்படுத்துபவர்களுக்கும், மாற்றுத்திறனாளி குழந்தைகளை வளர்க்கும் பெற்றோர்களுக்கும் இடையே உள்ள புரிதல் இடைவெளி குறித்து பிரதீப் கவலை தெரிவிக்கிறார். குறிப்பாக, மக்கள் தொகை கணக்கெடுப்பின்போது இவர்களைப் பொதுவான பிரிவில் வகைப்படுத்துவது அவர்களின் தேவைகளைப் புரிந்துகொள்வதில் சிக்கலை ஏற்படுத்துகிறது என்று அவர் சுட்டிக்காட்டுகிறார்.

தற்போது இந்த மையத்தில் 13 மாணவர்கள் பயிற்சிகளைப் பெற்று வருகின்றனர். இவர்களுக்குப் பேச்சுப் பயிற்சி மற்றும் சிறப்புப் கல்வி வழங்க 10க்கும் மேற்பட்ட பணியாளர்கள் அர்ப்பணிப்புடன் செயல்படுகின்றனர். இந்தியாவில் இவர்களுக்கென தரப்படுத்தப்பட்ட பாடத்திட்டம் இல்லாத சூழலில், ஒவ்வொரு மாணவரின் தேவைக்கேற்ப தனிப்பட்ட முறையில் பயிற்சி வழங்கப்படுகிறது. இந்த முன்மாதிரியான திட்டத்தில் இணைய விரும்பும் மற்ற ஆட்டிசம் பாதித்த இளைஞர்களும் வேலூரில் உள்ள இந்த மையத்தைத் தொடர்புகொண்டு தங்களின் படைப்புகளை விற்பனைக்கு வழங்கலாம் என்று அழைப்பு விடுக்கப்பட்டுள்ளது.