வேலூர் பள்ளி வளாகத்தில் விஷப் பாம்புகள் அட்டகாசம்: சுற்றுச்சுவர் அமைக்க பெற்றோர்கள் கோரிக்கை

வேலூர் மாவட்டம் கேசவபுரம் தொடக்கப்பள்ளியில் சுற்றுச்சுவர் இல்லாததால், விஷப் பாம்புகள் மற்றும் சமூக விரோதிகளின் அச்சுறுத்தலில் மாணவர்கள் தவித்து வருகின்றனர்.

வேலூர் மாவட்டம் கணியம்பாடி ஒன்றியத்திற்கு உட்பட்ட கேசவபுரம் ஊராட்சி ஒன்றிய தொடக்கப்பள்ளியில் பயிலும் சுமார் 159 மாணவர்களின் பாதுகாப்பு கேள்விக்குறியாகியுள்ளது. கடந்த 30 ஆண்டுகளாக சுற்றுச்சுவர் வசதி இல்லாத இந்தப்பள்ளி வளாகம், தற்போது விஷப் பாம்புகள் மற்றும் பூச்சிகளின் புகலிடமாக மாறியுள்ளது. கடந்த வாரம் பள்ளியின் கழிப்பறைக்குள் பாம்பு புகுந்த சம்பவம், பெற்றோர்கள் மற்றும் ஆசிரியர்கள் மத்தியில் பெரும் அச்சத்தை ஏற்படுத்தியுள்ளது. மாணவர்களின் பாதுகாப்பு குறித்த தங்களின் கவலையை வெளிப்படுத்திய பெற்றோர் நாதியா, பள்ளி கட்டிடத்திற்குப் பின்னால் உள்ள ஏரி மற்றும் கழிவுநீர் கால்வாய் காரணமாகவே விஷப் பாம்புகள் மற்றும் பூச்சிகளின் நடமாட்டம் அதிகமாக இருப்பதாகக் குறிப்பிட்டார்.

பள்ளி வளாகத்தைச் சுற்றியுள்ள புதர்மண்டிக் கிடக்கும் பகுதிகள் பாம்புகள் தங்குவதற்கு ஏதுவான சூழலை உருவாக்கித் தருவதாகக் குற்றம் சாட்டியுள்ள பெற்றோர், கோடை வெயிலின் தாக்கம் மற்றும் மழைக்காலங்களில் தேங்கும் கழிவுநீரால் பள்ளி வளாகமே சுகாதாரமற்ற சூழலில் இருப்பதாகவும் வேதனை தெரிவிக்கின்றனர். மேலும், பள்ளிக்கு முறையான பாதுகாப்பு சுவர் இல்லாததால், தெருநாய்களின் தொல்லை மற்றும் மது அருந்துபவர்கள் பள்ளி வளாகத்தில் மது பாட்டில்களை வீசிச் செல்லும் அவலமும் தொடர்ந்து நடைபெற்று வருகிறது. இது பள்ளி மாணவர்களின் நல்வாழ்விற்குப் பெரும் அச்சுறுத்தலாக அமைந்துள்ளதாக இப்பகுதி மக்கள் சுட்டிக்காட்டுகின்றனர்.

கடந்த ஆகஸ்ட் 23 ஆம் தேதி, மதிய உணவு தயாரிக்கும் சமையல் அறையின் பூட்டை உடைத்து மூன்று சமையல் எரிவாயு உருளைகள் திருடப்பட்ட சம்பவம் பள்ளி நிர்வாகத்தினரை அதிர்ச்சியில் ஆழ்த்தியது. இந்தத் திருட்டுச் சம்பவம் தொடர்பாக இதுவரை குற்றவாளிகள் கண்டறியப்படவில்லை என்பது குறிப்பிடத்தக்கது. சமூக விரோதிகளின் நடமாட்டத்தைத் தடுப்பதற்கும், மாணவர்களின் பாதுகாப்பை உறுதி செய்வதற்கும் பள்ளி வளாகத்தைச் சுற்றி உறுதியான சுற்றுச்சுவர் உடனடியாகக் கட்டப்பட வேண்டும் என்று கோரி, பாதிக்கப்பட்ட பெற்றோர்கள் மற்றும் அப்பகுதி மக்கள் வேலூர் மாவட்ட ஆட்சியர் பி.எஸ். லீலா அலெக்ஸ் அவர்களிடம் நேரில் மனு அளித்துள்ளனர்.

பெற்றோர்களின் இந்தத் தொடர் கோரிக்கை மற்றும் பாதுகாப்புப் புகார்கள் குறித்து கருத்து தெரிவித்துள்ள கணியம்பாடி வட்டார வளர்ச்சி அலுவலர் ரமேஷ் குமார், சுற்றுச்சுவர் அமைப்பதற்கான கோரிக்கை மனு தங்களுக்குக் கிடைத்துள்ளதாகவும், இதற்கான நிதியினை அரசுத் திட்டங்களின் கீழ் ஒதுக்கி விரைந்து நடவடிக்கை எடுக்கப்படும் என்றும் உறுதியளித்துள்ளார். கல்வி பயிலும் குழந்தைகளின் பாதுகாப்பு மிக முக்கியமானது என்பதால், மாவட்ட நிர்வாகம் விரைந்து செயல்பட்டு சுற்றுச்சுவர் கட்டித் தருமா என்பதே தற்போது இப்பகுதி மக்களின் எதிர்பார்ப்பாக உள்ளது.