விக்சித் பாரத்-ரோஜ்கர் திட்டம்: வேலைவாய்ப்பு நாட்களை 150 ஆக உயர்த்தியது தமிழக அரசு

தமிழ்நாட்டில் விக்சித் பாரத்-ரோஜ்கர் மற்றும் ஆஜீவிகா மிஷன் திட்டத்தின் கீழ் வேலைவாய்ப்பு நாட்களை 150 ஆக உயர்த்தி தமிழக அரசு உத்தரவிட்டுள்ளது.

தமிழகத்தில் கிராமப்புற வளர்ச்சியை ஊக்குவிக்கும் வகையிலும், பின்தங்கிய மற்றும் பாதிக்கப்படக்கூடிய பிரிவினரின் வாழ்வாதாரத்தை மேம்படுத்தும் நோக்கிலும், விக்சித் பாரத்-கேரண்டி ஃபார் ரோஜ்கர் அண்ட் ஆஜீவிகா மிஷன் (VB-G RAM G) திட்டத்தின் கீழ் வழங்கப்பட்டு வந்த வேலைவாய்ப்பு நாட்களை 150 ஆக உயர்த்தி தமிழக அரசு முக்கிய அறிவிப்பை வெளியிட்டுள்ளது. முன்னதாக இத்திட்டத்தின் கீழ் 125 நாட்கள் வேலை வழங்கப்பட்டு வந்த நிலையில், தற்போது கூடுதலாக 25 நாட்கள் வேலைவாய்ப்பு உறுதி செய்யப்பட்டுள்ளது. இந்த உயர்வு குறிப்பாக பெண்கள் தலைமை தாங்கும் குடும்பங்கள், ஆதரவற்ற பெண்கள், மாற்றுத்திறனாளிகள் உள்ள குடும்பங்கள் மற்றும் பழங்குடியினர் மற்றும் பட்டியலினத்தவர் பிரிவினருக்கு பெரும் பயனை அளிக்கும் என எதிர்பார்க்கப்படுகிறது.

இந்தத் திட்டத்தைச் செயல்படுத்துவதற்காக 2026-27-ஆம் நிதியாண்டில் மாநில அரசு 100 கோடி ரூபாய் நிதியை ஒதுக்கியுள்ளது. இந்தத் தொகை முழுவதும் மாநில அரசின் சொந்த நிதி மூலமே ஈடு செய்யப்படும் என்பது குறிப்பிடத்தக்கது. கடந்த ஜூலை மாதம் நடைபெற்ற ஆய்வுக்கூட்டத்தில் முதலமைச்சர் சி.ஜோசப் விஜய் வழங்கிய அறிவுறுத்தல்களின் அடிப்படையில், கிராமப்புற மேம்பாடு மற்றும் ஊராட்சித் துறை இதற்கான நிர்வாக அனுமதியை வழங்கி அரசாணையைப் பிறப்பித்துள்ளது. இதன் மூலம், ஏற்கனவே 125 நாட்கள் வேலைவாய்ப்பை முடிக்கும் தகுதியுள்ள பயனாளிகளுக்கு, கூடுதலாக 25 நாட்கள் வேலை கிடைப்பது உறுதி செய்யப்பட்டுள்ளது.

இந்தத் திட்டம் பழங்குடியினர் மற்றும் வனப்பகுதிகளில் வசிக்கும் பிற பாரம்பரிய வனவாசிகள் (வன உரிமை அங்கீகாரம்) சட்டம், 2006-ன் கீழ் பயன்பெறும் பயனாளிகளையும் உள்ளடக்கியது. மத்திய அரசின் மகாத்மா காந்தி தேசிய ஊரக வேலைவாய்ப்பு உறுதித் திட்டத்திற்குப் பதிலாக அறிமுகப்படுத்தப்பட்ட இந்த விக்சித் பாரத் திட்டம், கடந்த ஜூலை 1-ஆம் தேதி முதல் நடைமுறைக்கு வந்தது. மத்திய அரசின் இந்தத் திட்டத்தில் பொதுவாக வேலைவாய்ப்பு 100 நாட்களில் இருந்து 125 நாட்களாக அதிகரிக்கப்பட்டிருந்தது, தற்போது தமிழக அரசு கூடுதலாக 25 நாட்களை வழங்கி முன்னுதாரணமாகச் செயல்பட்டுள்ளது.

பொதுவாக மத்திய மற்றும் மாநில அரசுகள் 60:40 என்ற விகிதத்தில் நிதிப் பங்களிப்பை மேற்கொண்டு வந்தாலும், இந்த கூடுதல் 25 நாட்களுக்கான 100 கோடி ரூபாய் நிதிச் சுமையை முழுமையாக மாநில அரசே ஏற்பது குறிப்பிடத்தக்கது. ஊரகப் பகுதிகளில் வசிக்கும் அடித்தட்டு மக்களின் பொருளாதார நிலையை உயர்த்தவும், வேலைவாய்ப்பின்மையைப் போக்கவும் இந்தத் திட்டம் தொடர்ந்து வலுவான ஒரு கருவியாகச் செயல்படும் என்று அரசு தரப்பில் தெரிவிக்கப்பட்டுள்ளது. இத்திட்டத்தின் மூலம் நேரடியாகப் பயன்பெறும் மக்களின் வாழ்வாதாரத்தில் குறிப்பிடத்தக்க மாற்றங்கள் ஏற்படும் என எதிர்பார்க்கப்படுகிறது.