dhina anjal logo
முகப்பு/தமிழ்நாடு

வௌவால்களுக்காக பட்டாசு வெடிக்காத கிராமங்கள்: மணப்பாறை மக்களின் நெகிழ்ச்சியான கலாச்சாரம்

By K. ராதாகிருஷ்ணன்
126 views
மணப்பாறை அருகே உள்ள தோப்புப்பட்டி மற்றும் சாம்பட்டி கிராம மக்கள், வௌவால்களை குலதெய்வமாக கருதி தீபாவளி உள்ளிட்ட பண்டிகைகளில் பட்டாசு வெடிக்காமல் பாதுகாத்து வருகின்றனர்.

மணப்பாறை அருகே உள்ள தோப்புப்பட்டி மற்றும் சாம்பட்டி கிராம மக்கள், வௌவால்களை குலதெய்வமாக கருதி தீபாவளி உள்ளிட்ட பண்டிகைகளில் பட்டாசு வெடிக்காமல் பாதுகாத்து வருகின்றனர்.

திருச்சிராப்பள்ளி மாவட்டம், மணப்பாறைக்கு அருகில் அமைந்துள்ள தோப்புப்பட்டி மற்றும் சாம்பட்டி கிராமங்கள் மற்ற இடங்களில் இருந்து முற்றிலும் மாறுபட்டு, அமைதியான தீபாவளியைக் கொண்டாடி வருகின்றன. பொதுவாக தீபாவளி என்றாலே பட்டாசு சத்தமும், வண்ண விளக்குகளும் நிறைந்ததாக இருக்கும் நிலையில், இந்த கிராம மக்கள் தங்களின் பகுதியில் உள்ள ஆலமரங்களில் தங்கியிருக்கும் ஆயிரக்கணக்கான பழ வௌவால்களைப் பாதுகாப்பதற்காக, பட்டாசு வெடிக்கும் வழக்கத்தை முற்றிலும் தவிர்த்துள்ளனர். இந்த வௌவால்களைத் தங்களின் குலதெய்வத்தின் அவதாரமாக பல தலைமுறைகளாக கிராம மக்கள் நம்பி வருவது நெகிழ்ச்சியை ஏற்படுத்தியுள்ளது.

இந்த கிராமங்களில் உள்ள முனியப்பசாமி கோயில் அருகே உள்ள ஆலமரங்களில் தங்கியிருக்கும் வௌவால்களைக் காக்க, பெரியவர்கள் மட்டுமல்லாது சிறுவர்களும் ஆர்வத்துடன் முன்வருகின்றனர். இது குறித்து பேசிய ஊர் மக்கள், வௌவால்களைத் துன்புறுத்தாமல் இருப்பதற்காகத் தீபாவளி மட்டுமல்லாது, கோயில் திருவிழாக்கள் மற்றும் விசேஷ காலங்களிலும் பட்டாசுகளைத் தவிர்ப்பதை ஒரு எழுதப்படாத விதியாகக் கடைபிடித்து வருகின்றனர். இந்த உயிரிணங்களின் மீது கிராம மக்கள் கொண்டுள்ள அதீத அன்பும், நம்பிக்கையும் சுற்றுச்சூழல் பாதுகாப்பிற்கு ஒரு சிறந்த முன்னுதாரணமாகத் திகழ்கிறது.

சாம்பட்டி கிராமத்தில் உள்ள அரிய பெருமாள் கோயில் பூசாரி ஊமைத்துரை கூறுகையில், சுமார் இருபது ஆண்டுகளுக்கு முன்பு மதுரையில் உள்ள அழகர் கோயிலுக்குச் சென்று திரும்பியபோது, வௌவால்கள் வடிவில் இறைவன் தங்களை பின்தொடர்ந்து வந்ததாக கிராம மக்கள் நம்பினர். அன்றிலிருந்து அந்த ஆலமரத்தை புனிதமாகக் கருதி, பட்டாசு வெடிப்பதைத் தவிர்த்து வௌவால்களைத் தெய்வமாகப் போற்றி வழிபட்டு வருகின்றனர். வௌவால்களின் வருகை மற்றும் அதன் தொடர்ச்சியான வாழ்விடம் அந்த மரத்தின் பாதுகாப்பான சூழலையும், கிராம மக்களின் ஒத்துழைப்பையும் பறைசாற்றுகிறது.

வனவிலங்கு பாதுகாப்பு உயிரியலாளர் அசோக சக்கரவர்த்தி கூறுகையில், மனித இடையூறுகள் இல்லாத அமைதியான சூழலும், உணவிற்கான வாய்ப்புகளும் இந்த வௌவால்கள் ஒரே இடத்தில் நீண்ட காலம் தங்குவதற்கு முக்கியக் காரணங்களாகும் என்று விளக்குகிறார். இருப்பினும், அப்பகுதியில் உள்ள கல் உடைக்கும் தொழிற்சாலைகளால் வௌவால்களின் எண்ணிக்கை குறைந்து வருமோ என்ற அச்சத்தை உள்ளூர்வாசிகள் வெளிப்படுத்தியுள்ளனர். இத்தகைய அரிய வகை உயிரிணங்களைப் பாதுகாக்க அரசு உரிய நடவடிக்கைகளை மேற்கொள்ள வேண்டும் என்பதே அப்பகுதி மக்களின் கோரிக்கையாக உள்ளது.

More From Dhinaanjal


no comments
கமெண்ட் செய்ய தொடங்கவும்

ஹேஷ்டேக்ஸ்

#மணப்பாறை
#வௌவால்கள்
#தீபாவளி
#சுற்றுச்சூழல்
#கிராமத்துகலாச்சாரம்
#Manapparai
#FruitBats
#DeepavaliCelebration
#WildlifeConservation
#NatureProtection
#Dhinaanjal
#தினஅஞ்சல்
#தினஅஞ்சல் பப்ளிகேஷன்ஸ்
#Dhinaanjalpublications