விழுப்புரம்: சாதி பாகுபாடு மற்றும் அதிகார துஷ்பிரயோகம் - பெண் ஊராட்சித் தலைவர் தீக்குளிக்க முயற்சி

விழுப்புரம் மாவட்டத்தில் சாதி ரீதியாக ஒடுக்கப்படுவதாகவும், ஊராட்சி அதிகாரங்கள் பறிக்கப்பட்டதாகவும் தலித் பெண் ஊராட்சித் தலைவர் தீக்குளிக்க முயன்ற சம்பவம் அதிர்ச்சியை ஏற்படுத்தியுள்ளது.

விழுப்புரம் மாவட்டம், கொடுங்கால் ஊராட்சி மன்றத் தலைவராகப் பணியாற்றி வரும் ஜி. மலர்விழி என்பவர், மாவட்ட ஆட்சியர் அலுவலக வளாகத்தில் திடீரென தீக்குளிக்க முயன்ற சம்பவம் பெரும் பரபரப்பை ஏற்படுத்தியுள்ளது. தலித் சமூகத்தைச் சேர்ந்த தன்னை, ஊராட்சி துணைத் தலைவர் மற்றும் சில உள்ளூர் அதிகாரிகள் சாதி ரீதியாக தொடர்ந்து ஒடுக்கி வருவதாகவும், தனது அதிகாரங்களைப் பறித்து வருவதாகவும் அவர் அடுக்கடுக்கான குற்றச்சாட்டுகளை முன்வைத்துள்ளார். பாதுகாப்பு பணியில் இருந்த காவல்துறையினர் உடனடியாக தலையிட்டு, அவரை தடுத்து நிறுத்தியதைத் தொடர்ந்து, அவர் தனது கோரிக்கை மனுவை மாவட்ட ஆட்சியரிடம் அளித்தார்.

மலர்விழி முன்வைத்துள்ள பகீர் புகார்கள்: பாதிக்கப்பட்ட ஊராட்சித் தலைவர் மலர்விழி கூறுகையில், தான் தலித் சமூகத்தைச் சேர்ந்தவர் என்பதால் கடந்த நான்கரை ஆண்டுகளாக கடும் இன்னல்களுக்கு ஆளாகி வருவதாகத் தெரிவித்தார். ஊராட்சி அலுவலகத்தில் தனக்கென நாற்காலி வழங்க மறுப்பது முதல், சுதந்திர தினத்தன்று தேசியக் கொடியை ஏற்றவிடாமல் தடுப்பது வரை சாதி பாகுபாடு காட்டப்படுவதாக அவர் குற்றம் சாட்டியுள்ளார். ஊராட்சி தொடர்பான எந்தவொரு நடவடிக்கையிலும் தன்னை ஈடுபடுத்திக்கொள்ள விடாமல் முட்டுக்கட்டை போடப்படுவதாகவும் அவர் வேதனை தெரிவித்துள்ளார்.

துணைத் தலைவர் மற்றும் அதிகாரிகளின் அராஜகம்: ஊராட்சி துணைத் தலைவர் முனியம்மாள் மற்றும் அவரது சகோதரர் காத்தவராயன் ஆகியோர் வார்டு உறுப்பினர்களைத் தங்கள் கட்டுப்பாட்டில் வைத்துக்கொண்டு, தனக்கு எதிராகத் தொடர்ந்து செயல்படுவதாக மலர்விழி மனுவில் குறிப்பிட்டுள்ளார். சுதந்திரமாக முடிவெடுக்க முயன்றால், நம்பிக்கையில்லாத் தீர்மானம் கொண்டு வந்து பதவியில் இருந்து அகற்றிவிடுவோம் என மிரட்டல் விடுப்பதாக அவர் கூறியுள்ளார். இது குறித்து அப்போதைய மற்றும் தற்போதைய வட்டார வளர்ச்சி அலுவலர்களிடம் புகார் அளித்தும், அவர்கள் எந்த நடவடிக்கையும் எடுக்காமல், தாக்குதல் நடத்துபவர்களுடன் அனுசரித்துச் செல்லுமாறு அறிவுறுத்தியது மிகுந்த ஏமாற்றமளிப்பதாக அவர் குறிப்பிட்டுள்ளார்.

நிதிக் முறைகேடு மற்றும் கோரிக்கைகள்: தனது காசோலை அதிகாரத்தைப் பறித்துக்கொண்டதுடன், தான் மேற்கொண்ட பணிகளுக்கான ஊதியப் பட்டுவாடாவையும் தடுத்து வைத்துள்ளதாக அவர் குற்றம் சாட்டியுள்ளார். குறிப்பாக, 100 நாள் வேலைவாய்ப்புத் திட்டத்தில் 10 லட்ச ரூபாய்க்கும் அதிகமான கமிஷன் கேட்டு அதிகாரிகள் மற்றும் துணைத் தலைவர் தரப்பினர் தன்னை வற்புறுத்துவதாகவும், அதற்கு ஒத்துழைக்க மறுத்தால் ஏளனமாகப் பேசுவதாகவும் அவர் தெரிவித்துள்ளார். இந்தச் சம்பவங்கள் குறித்து முழுமையான விசாரணை நடத்தி, சம்பந்தப்பட்ட அதிகாரிகள் மற்றும் நிர்வாகிகள் மீது கடும் நடவடிக்கை எடுக்க வேண்டும் என்றும், தனது அதிகாரங்களை மீட்டுத் தர வேண்டும் என்றும் மாவட்ட ஆட்சியரிடம் அவர் வலியுறுத்தியுள்ளார்.