சாதிப் பெயர் நீக்கம்: விருதுநகரில் ஒரு கிராமத்திற்கு பெயர் மாற்றம் செய்து தமிழக அரசு உத்தரவு

விருதுநகர் மாவட்டம் ஸ்ரீவில்லிபுத்தூர் அருகே சாதிப் பெயர் கொண்ட கிராமத்திற்கு 'வடக்கு அச்சம்தவிர்த்தான்' என பெயர் மாற்றம் செய்ய அரசு உத்தரவிட்டுள்ளது.

விருதுநகர் மாவட்டம், ஸ்ரீவில்லிபுத்தூர் அருகே உள்ள அச்சம்தவிர்த்தான் ஊராட்சிக்கு உட்பட்ட கிராமம் ஒன்று, நீண்ட போராட்டத்திற்குப் பிறகு புதிய அடையாளத்தைப் பெற்றுள்ளது. இதுவரை 'சேரி' என்ற சாதிப் பெயரை உள்ளடக்கிய அடையாளத்துடன் அறியப்பட்ட அந்த கிராமம், இனி 'வடக்கு அச்சம்தவிர்த்தான்' என்ற புதிய பெயரில் அழைக்கப்படும் என்று தமிழக அரசு அதிகாரப்பூர்வமாக அறிவித்துள்ளது. வருவாய்த் துறை கூடுதல் தலைமைச் செயலாளர், இது தொடர்பாக உரிய நடவடிக்கைகளை மேற்கொள்ளுமாறு விருதுநகர் மாவட்ட ஆட்சியருக்கு வெள்ளிக்கிழமை உத்தரவிட்டுள்ளார்.

இந்த கிராமத்தில் சுமார் 200 குடியிருப்பாளர்கள் வசித்து வருகின்றனர். பல ஆண்டுகளாக அந்த மக்கள், தங்கள் ஊரின் பெயரில் உள்ள சாதி அடையாளம் தங்களுக்கு சமூக ரீதியான பாகுபாட்டையும், மன உளைச்சலையும் தருவதாகக் கூறி பெயர் மாற்றத்திற்காகப் போராடி வந்தனர். தமிழக அரசு ஏற்கனவே மாநிலம் முழுவதும் உள்ள சாதிப் பெயர்களைக் கொண்ட ஊர்களுக்குப் பதிலாக, நடுநிலையான பெயர்களைச் சூட்ட வேண்டும் என்று கடந்த ஆண்டு அரசாணை வெளியிட்டிருந்தது. அந்த அரசாணையின் அடிப்படையில், தற்போது இந்த வரலாற்றுச் சிறப்புமிக்க நடவடிக்கை மேற்கொள்ளப்பட்டுள்ளது.

பள்ளி செல்லும் மாணவர்கள் மற்றும் இளைஞர்கள் தங்கள் ஊரின் பெயரால் பல்வேறு கேலி கிண்டல்களுக்கும், புறக்கணிப்புகளுக்கும் ஆளாக வேண்டிய சூழல் இருந்ததாக அப்பகுதி மக்கள் வேதனை தெரிவிக்கின்றனர். ஊரின் பெயரைக் கேட்டவுடன் மற்றவர்கள் பழகத் தயங்குவதும், மாணவர்களை பள்ளிகளில் மற்ற சக மாணவர்கள் ஏளனமாகப் பார்ப்பதும் சமூக ரீதியாக பெரும் சிக்கலாக இருந்தது. இந்தச் சூழலில், அரசாங்கத்தின் இந்த முடிவு தங்களுக்குப் பெரிய நிம்மதியையும், சமூக மரியாதையையும் பெற்றுத் தந்துள்ளதாக கிராம மக்கள் மகிழ்ச்சி தெரிவித்துள்ளனர்.

சென்னை உயர்நீதிமன்ற மதுரை கிளை, சாதிப் பெயர்களை நீக்குவதற்கு அரசு பிறப்பித்த அரசாணையை எதிர்த்துத் தொடரப்பட்ட மனுவை தள்ளுபடி செய்து கடந்த புதன்கிழமை உத்தரவிட்டது. நீதிமன்றத்தின் இந்தத் தீர்ப்பு, கிராம மக்களின் நீண்டநாள் கோரிக்கையை நிறைவேற்ற ஒரு வலுவான சட்டப் பின்னணியை வழங்கியுள்ளது. அரசு எடுத்துள்ள இந்த துரிதமான நடவடிக்கை, சாதி அடையாளங்களால் பாதிக்கப்படும் பிற பகுதிகளுக்கும் ஒரு முன்னுதாரணமாக அமையும் என்று சமூக ஆர்வலர்கள் கருதுகின்றனர்.