பொங்கல் 2027-ல் வெளியாகும் வீஜே சித்துவின் 'தாயங்கரம்': படக்குழு வெளியிட்ட அதிரடி டீசர்

வீஜே சித்து இயக்கி நடித்துள்ள 'தாயங்கரம்' திரைப்படம் 2027 பொங்கல் பண்டிகையை முன்னிட்டு திரையரங்குகளில் வெளியாகிறது.

பிரபல யூடியூபரும், கண்டெண்ட் கிரியேட்டருமான வீஜே சித்து, முதன்முறையாக திரைக்கதை எழுதி இயக்குவதுடன் கதாநாயகனாகவும் நடித்துள்ள திரைப்படம் 'தாயங்கரம்'. நீண்ட நாட்களாக ரசிகர்கள் மத்தியில் எதிர்பார்ப்பை ஏற்படுத்தியிருந்த இந்த படத்தின் அதிகாரப்பூர்வ டீசர் தற்போது வெளியாகியுள்ளது. இந்த டீசருடன் சேர்த்து, இப்படம் 2027-ஆம் ஆண்டு பொங்கல் பண்டிகையை முன்னிட்டு திரையரங்குகளில் வெளியாகும் என்ற மகிழ்ச்சியான அறிவிப்பையும் படக்குழுவினர் வெளியிட்டுள்ளனர்.

வீஜே சித்துவின் வாழ்க்கை பயணம்: இப்படம் தனது வாழ்க்கையை அடிப்படையாகக் கொண்டு உருவாக்கப்பட்டுள்ளதாக தயாரிப்பாளர் ஐசரி கே. கணேஷ் தெரிவித்துள்ளார். ஒரு கல்லூரி மாணவனின் வாழ்க்கை, காதல் மற்றும் அனுபவங்களை மையமாக வைத்து இப்படம் தயாராகியுள்ளது. கண்டெண்ட் கிரியேட்டரான டியூட் விக்கி, இப்படத்திற்கு கிரியேட்டிவ் இயக்குநராகப் பணியாற்றியுள்ளார். வேல்ஸ் பிலிம் இண்டர்நேஷனல் பேனரின் கீழ் ஐசரி கே. கணேஷ் இப்படத்தைத் தயாரிக்க, அவரது மகள் குஷ்மிதா கணேஷ் இணை தயாரிப்பாளராகப் பொறுப்பேற்றுள்ளார்.

நட்சத்திரப் பட்டாளமும் தொழில்நுட்பக் குழுவும்: அக்டோபர் 2025-இல் தொடங்கப்பட்ட இந்தத் திரைப்படத்தின் படப்பிடிப்பு பணிகள் இந்த ஆண்டு ஜூலை மாதத்துடன் முழுமையாக நிறைவடைந்தன. இப்படத்தில் நட்டி நட்ராஜ், நிதின் சத்யா, வாட்ஸ்அப் மணி, ஹர்ஷத் கான், இளவரசு, காளி வெங்கட், ஆதித்யா கதிர், சுஷ்மிதா ஷெட்டி, இஸ்மத் பானு, மல்லேஷ் கண்ணன், சுட்டி அரவிந்த், நக்கலைட்ஸ் செல்லா, தீபா, பாண்டிச்சேரி சிவகுமார் மற்றும் ஓ.ஏ.கே. சுந்தர் என ஒரு பெரும் நட்சத்திர பட்டாளமே நடித்துள்ளனர். மேலும், இயக்குனர் அஸ்வத் மாரிமுத்து இப்படத்தில் சிறப்புத் தோற்றத்தில் நடித்திருப்பது குறிப்பிடத்தக்கது.

தொழில்நுட்ப நுணுக்கங்கள்: இப்படத்திற்கு சித்து குமார் இசையமைக்க, தினேஷ் கிருஷ்ணன் பி. ஒளிப்பதிவு செய்துள்ளார். எடிட்டிங் பணிகளை பிரதீப் இ. ராகவ் கவனிக்க, வினோத் ராஜ்குமார் என். கலை இயக்குநராகவும், விக்கி ஸ்டண்ட் கொரியோகிராபராவும் பணியாற்றியுள்ளனர். பிளாக் ஷீப் யூடியூப் சேனல் மூலம் பிரபலமான வீஜே சித்து, அஸ்வத் மாரிமுத்து மற்றும் பிரதீப் ரங்கநாதன் கூட்டணியில் வெளியான 'டிராகன்' படத்திற்குப் பிறகு தற்போது தனது இயக்கத்தில் உருவாகியுள்ள 'தாயங்கரம்' மூலம் முழுநேரத் திரையுலகப் பயணத்தைத் தொடங்கியுள்ளார்.