நீலகிரியில் கழுகுகள் பாதுகாப்பு விழிப்புணர்வு முகாம்: சூழலியல் முக்கியத்துவத்தை வலியுறுத்திய வனத்துறை

நீலகிரி மாவட்டத்தில் சர்வதேச கழுகுகள் பாதுகாப்பு விழிப்புணர்வு தினத்தை முன்னிட்டு பல்வேறு விழிப்புணர்வு நிகழ்ச்சிகள் மற்றும் போட்டிகள் நடத்தப்பட்டன.

நீலகிரி மாவட்டத்தில் சர்வதேச கழுகுகள் பாதுகாப்பு தினத்தை முன்னிட்டு, அருள்agam என்ற தன்னார்வ அமைப்பு, அரசு கலைக் கல்லூரி மற்றும் ஸ்டேட் ஸ்ட்ரீட் தன்னார்வலர்களுடன் இணைந்து செப்டம்பர் 1 முதல் 6-ஆம் தேதி வரை பல்வேறு விழிப்புணர்வு நிகழ்ச்சிகளை முன்னெடுத்தது. கழுகுகளின் சுற்றுச்சூழல் முக்கியத்துவத்தை இளைய தலைமுறையினரிடம் கொண்டு செல்லும் வகையில், கல்லூரி மாணவர்களுக்கு ஓவியம் வரைதல், பேச்சுப் போட்டி மற்றும் வினாடி-வினா போட்டிகள் நடத்தப்பட்டு சான்றிதழ்கள் வழங்கப்பட்டன. பங்கேற்பாளர்கள் அனைவரும் கழுகுகளைப் பாதுகாப்போம் என உறுதிமொழிப் பதாகையில் கையெழுத்திட்டனர்.

வன உயிரியல் துறைத் தலைவர் டாக்டர் பி. ராமகிருஷ்ணன் கழுகுகளின் வாழ்விடங்கள் மற்றும் அவை சூழலியல் சமநிலையைப் பேணுவதில் வகிக்கும் முக்கிய பங்கு குறித்து உரையாற்றினார். நிகழ்ச்சியின் ஒரு பகுதியாக, ஆனைக்கட்டி கிராமத்தில் வாலண்டரி முறையில் விழிப்புணர்வை ஏற்படுத்த 'வல்கர் டிராபி' என்ற வாலிபால் போட்டி நடத்தப்பட்டது. இந்த நிகழ்விற்கு சிகூர் சரக வனத்துறை அதிகாரி சுரேஷ் பாபு தலைமை தாங்கினார். விளையாட்டு மற்றும் இளைஞர்களின் பங்களிப்பு மூலம் கழுகுகள் பாதுகாப்பான மண்டலமாக நீலகிரியை மாற்றுவதற்கான அவசியம் குறித்த விழிப்புணர்வு பொதுமக்களிடையே கொண்டு செல்லப்பட்டது.

கால்நடைகளுக்கு சிகிச்சை அளிக்கும்போது டிக்லோஃபெனாக் (Diclofenac) போன்ற அபாயகரமான வலி நிவாரணி மருந்துகளைத் தவிர்ப்பது குறித்து கால்நடை உரிமையாளர்களுக்கு அறிவுறுத்தப்பட்டது. இதற்கு மாற்றாக, டாக்டர் புண்ணியமூர்த்தியின் பாரம்பரிய மருத்துவ முறைப்படி உருவாக்கப்பட்ட எத்தனோ-வெட்னரி மெடிசின் (EVM) மருந்து தொகுப்புகள் இலவசமாக வழங்கப்பட்டன. கால்நடை வளர்ப்பவர்கள் தங்கள் கால்நடைகள் இறக்கும் பட்சத்தில், அவை கழுகுகளுக்கு பாதுகாப்பான உணவாக இருப்பதை உறுதி செய்ய வேண்டும் என்றும், சுற்றுச்சூழல் பாதுகாப்பில் மக்கள் ஒத்துழைக்க வேண்டும் என்றும் கேட்டுக்கொள்ளப்பட்டது.

நீலகிரி பகுதியை அதிகாரப்பூர்வமாக கழுகுகள் பாதுகாப்பான மண்டலமாக அறிவிக்க, வனத்துறையின் வழிகாட்டுதலுடன் கால்நடை திசு மாதிரிகள் சேகரிக்கப்பட்டு வருகின்றன. இவற்றை முறையாகப் பாதுகாக்கும் பொருட்டு, எஸ். பாரதிதாசன் ஐபிஏஎன் (IPAN) அறக்கட்டளைக்கு டீப் ஃப்ரீசரை வழங்கினார். கழுகுகள் இயற்கையின் தூய்மைப் பணியாளர்களாகச் செயல்பட்டு தொற்றுநோய்களைத் தடுப்பதில் முக்கியப் பங்காற்றுகின்றன என்று சுட்டிக்காட்டிய பாரதிதாசன், கழுகுகளின் எண்ணிக்கை 99 சதவீதம் வரை குறைந்துள்ளதால், அவற்றைப் பாதுகாப்பது மனித குல ஆரோக்கியத்திற்கும் அவசியமானது என்று வலியுறுத்தினார்.