சென்னையில் அமைகிறது அமெரிக்காவின் வால்கிரீன்ஸ் நிறுவனத்தின் புதிய தொழில்நுட்ப மையம்: தமிழகத்தில் அதிகரிக்கும் வேலைவாய்ப்புகள்

அமெரிக்காவின் புகழ்பெற்ற வால்கிரீன்ஸ் நிறுவனம் சென்னையில் தனது உலகளாவிய தொழில்நுட்ப மையத்தை அமைக்க தமிழக அரசுடன் புரிந்துணர்வு ஒப்பந்தம் மேற்கொண்டுள்ளது.

அமெரிக்காவைச் சேர்ந்த முன்னனி மருந்தக மற்றும் சுகாதார நிறுவனமான வால்கிரீன்ஸ், சென்னையில் தனது புதிய உலகளாவிய திறன் மையத்தை (GCC) அமைக்கத் திட்டமிட்டுள்ளது. இதற்கான புரிந்துணர்வு ஒப்பந்தம், தமிழக முதலமைச்சர் சி. ஜோசப் விஜய் முன்னிலையில் கையெழுத்தானது. இந்த புதிய மையம் சென்னையின் தரமணி பகுதியில் உள்ள டிஎல்எஃப் டவுன்டவுனில் அமைய உள்ளது. இது நிறுவனத்தின் உலகளாவிய தொழில்நுட்பம் மற்றும் வணிகச் செயல்பாடுகளை மேம்படுத்தும் வகையில் செயல்படும் என்று எதிர்பார்க்கப்படுகிறது.

இந்தத் திட்டத்தின் முதல் கட்டமாக சுமார் 250 உயர்தர வேலைவாய்ப்புகள் உருவாக்கப்படும் என்று தெரிவிக்கப்பட்டுள்ளது. வரும் ஆண்டுகளில் இந்த மையத்தின் விரிவாக்கத்திற்கு ஏற்ப கூடுதல் பணியாளர்கள் பணியமர்த்தப்படுவார்கள். சென்னையின் மென்பொருள் பொறியியல் திறமை மற்றும் வலுவான சுகாதாரத்துறை சூழல் காரணமாகவே, வால்கிரீன்ஸ் நிறுவனம் தனது மையத்தை அமைக்க இந்த இடத்தை தேர்வு செய்துள்ளது. அமெரிக்கா மற்றும் ஐரோப்பாவைச் சேர்ந்த பல பன்னாட்டு நிறுவனங்கள் தொடர்ந்து சென்னையில் தங்களது வணிக மையங்களை அமைத்து வருவது, மாநிலத்தின் பொருளாதார வளர்ச்சிக்கு பெரும் ஊக்கமளிப்பதாக அமைந்துள்ளது.

தமிழக அரசு சமீபத்தில் சட்டமன்றத்தில் அறிவித்த 'ஜிசிசி காரிடார் மற்றும் மேம்பாட்டுத் திட்டம்' இத்தகைய நிறுவனங்களை ஈர்க்கும் வகையில் வடிவமைக்கப்பட்டுள்ளது. குறிப்பாக பல்லாவரம்-துரைப்பாக்கம் ரேடியல் சாலை, மவுண்ட்-பூந்தமல்லி நெடுஞ்சாலை மற்றும் ராஜீவ் காந்தி சாலை ஆகிய பகுதிகள் புதிய வேலைவாய்ப்பு மண்டலங்களாக உருவாக்கப்பட்டு வருகின்றன. இந்த திட்டத்தின் மூலம் ஜிசிசி நிறுவனங்கள் சென்னையில் தடையின்றி செயல்பட வழிவகை செய்யப்படுகிறது.

மத்திய நிதியமைச்சர் நிர்மலா சீதாராமன் சமீபத்தில் தமிழகத்தை ஒரு முக்கிய ஜிசிசி மையமாக அடையாளப்படுத்தியிருந்தார். தற்போது தமிழகத்தில் சுமார் 350 மையங்கள் செயல்பட்டு வருவதாகவும், இது இந்தியாவின் மொத்த எண்ணிக்கையில் 10 சதவீதமாகும் என்றும் அவர் குறிப்பிட்டார். சிபிஆர்இ (CBRE) அமைப்பின் சமீபத்திய ஆய்வின்படி, 2030-ஆம் ஆண்டிற்குள் சென்னையில் உள்ள ஜிசிசி மையங்களின் எண்ணிக்கை 460-ஐ எட்டும் என்றும், சுமார் 3.7 லட்சம் பணியாளர்கள் இந்த துறையில் பணிபுரிவார்கள் என்றும் கணிக்கப்பட்டுள்ளது. இது தமிழகத்தின் தொழில்நுட்ப வளர்ச்சியை உலக அளவில் கொண்டு செல்லும் ஒரு மைல்கல்லாகப் பார்க்கப்படுகிறது.