நீலகிரி: குடியிருப்பு பகுதிக்குள் புகுந்த காட்டு யானை - மக்கள் பீதி

நீலகிரி மாவட்டம் கூடலூர் அருகே உள்ள குடியிருப்பு பகுதிக்குள் புகுந்த காட்டு யானையால் பொதுமக்கள் அச்சமடைந்தனர்.

நீலகிரி மாவட்டம் கூடலூர் அருகே உள்ள புதுர்வயல்-விமலகிரி சாலையில் சனிக்கிழமை காலை காட்டு யானை ஒன்று நுழைந்ததால் அப்பகுதி மக்களிடையே பெரும் பரபரப்பு நிலவியது. காலை நேரத்தில் நடைப்பயிற்சி மேற்கொண்டவர்கள் மற்றும் வாகன ஓட்டிகள் திடீரென யானையைக் கண்டு அதிர்ச்சியடைந்தனர். உடனடியாக இது குறித்து வனத்துறைக்கு தகவல் தெரிவிக்கப்பட்டது. யானை குடியிருப்பு பகுதிக்குள் நுழைந்ததைக் கண்ட பொதுமக்கள், பாதுகாப்பிற்காகத் தங்களது வீடுகளுக்குள் விரைந்து சென்றனர். குறிப்பாக வீட்டின் முன் பகுதியில் வேலை செய்துகொண்டிருந்த பெண்கள் யானையைக்கண்டு பீதியடைந்து வீட்டிற்குள் தஞ்சம் புகுந்தனர்.

குடியிருப்பு பகுதியில் இருந்த தெருநாய்கள் யானையை நோக்கிக் குரைத்ததால், யானை ஆத்திரமடைந்து வேகமாக ஓடியது. இதனால் அப்பகுதி மக்கள் பெரும் அச்சத்திற்கு உள்ளாகினர். வழக்கமாக இரவு நேரங்களில் காட்டு யானைகள் ஊருக்குள் வருவதாகவும், அப்போது வனத்துறையினர் அவற்றை வனப்பகுதிக்குள் விரட்டி விடுவதாகவும் அப்பகுதி மக்கள் தெரிவித்தனர். ஆனால், இந்த முறை பகல் நேரத்திலேயே காட்டு யானை குடியிருப்பு பகுதிக்குள் புகுந்ததால் பொதுமக்கள் மிகுந்த பதற்றத்திற்கு ஆளானார்கள். கூடலூர் வனப்பகுதியில் இருந்து வழிதவறி இந்த யானை குடியிருப்பு பகுதிக்குள் வந்ததாகக் கருதப்படுகிறது.

சம்பவம் குறித்து தகவல் அறிந்த வனத்துறை அதிகாரிகள் உடனடியாக களத்தில் இறங்கி, யானையைக் கண்காணிக்கும் பணியில் ஈடுபட்டனர். சுமார் 30 நிமிடங்கள் நடந்த போராட்டத்திற்குப் பிறகு, வனத்துறையினர் அந்த யானையைப் பத்திரமாக மீண்டும் கூடலூர் வனப்பகுதிக்குள் விரட்டினர். யானை குடியிருப்பு பகுதிக்குள் புகுந்திருந்தாலும், இதனால் பெரிய அளவில் சொத்து சேதமோ அல்லது மனிதர்களுக்கும் யானைக்கும் இடையே நேரடி மோதலோ ஏற்படவில்லை என்று வனத்துறை வட்டாரங்கள் உறுதிப்படுத்தியுள்ளன.

வனத்துறையின் விரைவான நடவடிக்கையினால் பெரும் அசம்பாவிதங்கள் தவிர்க்கப்பட்டதாக அப்பகுதி மக்கள் நிம்மதி பெருமூச்சு விட்டனர். கூடலூர் மற்றும் அதனைச் சுற்றியுள்ள பகுதிகளில் காட்டு யானைகளின் நடமாட்டம் தொடர்ந்து காணப்படுவதால், வனத்துறையினர் தொடர்ந்து கண்காணிப்புப் பணிகளை மேற்கொண்டு வருகின்றனர். குடியிருப்பு பகுதிகளில் யானைகள் நுழையும்போது மக்கள் மிகுந்த எச்சரிக்கையுடன் இருக்க வேண்டும் என்றும், வனத்துறையின் வழிகாட்டுதல்களைப் பின்பற்ற வேண்டும் என்றும் அறிவுறுத்தப்பட்டுள்ளது.