உலக தடகள ஜூனியர் சாம்பியன்ஷிப்: புதிய தேசிய சாதனையுடன் அரையிறுதிக்கு முன்னேறிய முகமது அஷ்ஃபாக்

உலக தடகள ஜூனியர் சாம்பியன்ஷிப் போட்டியில் முகமது அஷ்ஃபாக் 400 மீட்டர் ஓட்டத்தில் புதிய தேசிய சாதனை படைத்து அரையிறுதிக்கு முன்னேறியுள்ளார்.

அமெரிக்காவின் யூஜின் நகரில் நடைபெற்று வரும் உலக தடகள ஜூனியர் சாம்பியன்ஷிப் போட்டியில், இந்திய வீரர் முகமது அஷ்ஃபாக் 400 மீட்டர் ஓட்டத்தில் புதிய தேசிய சாதனை படைத்து அசத்தியுள்ளார். 19 வயதான அஷ்ஃபாக், இந்தப் போட்டியில் 45.81 வினாடிகளில் இலக்கை எட்டி அரையிறுதிச் சுற்றுக்குத் தகுதி பெற்றுள்ளார். முன்னதாக, கடந்த ஏப்ரல் மாதம் நடைபெற்ற போட்டிகளில் 46.05 வினாடிகள் என்ற கால அளவை அவர் பதிவு செய்திருந்த நிலையில், தற்போது அதை முறியடித்து புதிய மைல்கல்லை எட்டியுள்ளார்.

போட்டியின் முதல் சுற்று ஹீட் 5 பிரிவில் களமிறங்கிய அஷ்ஃபாக், அமெரிக்க வீரர் ஜேடன் டிலியானுக்கு அடுத்தபடியாக இரண்டாவது இடத்தைப் பிடித்தார். ஒட்டுமொத்தமாகப் பார்க்கையில், அவர் நான்காவது இடத்தைப் பிடித்து அரையிறுதிக்குத் தகுதி பெற்றுள்ளார். இதே பிரிவில் பங்கேற்ற மற்றொரு இந்திய வீரர் பியூஷ் ராஜ், ஹீட் 6 சுற்றில் ஐந்தாவது இடத்தையும், ஒட்டுமொத்த தரவரிசையில் 35-வது இடத்தையும் மட்டுமே பிடித்து, 47.78 வினாடிகளுடன் போட்டியில் இருந்து வெளியேறினார்.

பெண்களுக்கான வட்டு எறிதல் இறுதிப்போட்டியில், இந்தியாவின் அமனத் கம்போஜ் சிறப்பான ஆட்டத்தை வெளிப்படுத்தினார். அவர் தனது வாழ்நாள் சிறந்த செயல்பாடாக 53.24 மீட்டர் தூரத்திற்கு வட்டை எறிந்து ஆறாவது இடத்தைப் பிடித்தார். இந்தப் போட்டியில் சீனாவின் சூ யிக்சின் 61.06 மீட்டர் தூரத்துடன் தங்கப் பதக்கத்தை வென்றார். அமெரிக்காவின் ஜேஸ்லின் மேஸி மற்றும் சைப்ரஸின் மெரினா ஹாஜிகோஸ்டா முறையே வெள்ளி மற்றும் வெண்கலப் பதக்கங்களைக் கைப்பற்றினர்.

ஆண்களுக்கான உயரம் தாண்டுதல் பிரிவில், இந்திய வீரர் வசந்த் 2.14 மீட்டர் உயரத்தைக் கடந்து இறுதிப்போட்டிக்குத் தகுதி பெற்றுள்ளார். தகுதிச் சுற்றின் ஏ பிரிவில் ஐந்தாவது இடத்தைப் பிடித்த அவர், ஒட்டுமொத்தமாக 11-வது வீரராக இறுதிச் சுற்றுக்கு முன்னேறியுள்ளார். அதே சமயம், மற்றொரு இந்திய வீரர் கே. அம்பரீஷ் 2.05 மீட்டர் உயரத்தை மட்டுமே கடக்க முடிந்தது. இதனால் அவர் 24-வது இடத்தைப் பிடித்து போட்டியிலிருந்து வெளியேற வேண்டிய சூழல் ஏற்பட்டது. மேலும், மகளிருக்கான குண்டு எறிதல், தடை தாண்டும் ஓட்டம் மற்றும் ஆண்களுக்கான மும்முறை தாண்டுதல் போன்ற பிற பிரிவுகளில் பங்கேற்ற இந்திய வீரர் மற்றும் வீராங்கனைகள் எதிர்பார்த்த வெற்றியைப் பெறத் தவறிவிட்டனர்.