யூடியூபர் வீட்டில் 118 சவரன் கொள்ளை: சமூக ஊடக பதிவுகளை கவனித்து சதி செய்த கும்பல் கைது

யூடியூபர் மதுமிதாவின் வீட்டில் 118 சவரன் நகை கொள்ளையடித்த வழக்கில் 4 பேர் கைது செய்யப்பட்டுள்ளனர்.

கன்னியாகுமரி மாவட்டம் நாகர்கோவில் அருகே உள்ள தம்மத்துகோணம் பகுதியில் வசித்து வரும் யூடியூபர் மதுமிதாவின் வீட்டில் நடந்த பெரும் நகை கொள்ளை வழக்கில் தொடர்புடைய நான்கு நபர்களை காவல்துறையினர் கைது செய்துள்ளனர். மதுமிதா மற்றும் அவரது கணவர் வினோத்குமார் தம்பதியினர் கடந்த வியாழக்கிழமை மாலை திருநெல்வேலிக்குச் சென்றிருந்த நேரத்தில், இந்தத் துணிகரக் கொள்ளைச் சம்பவம் அரங்கேறியுள்ளது. வீட்டின் முதல் தளத்தின் பின்பக்கக் கதவை கட்டர் மூலம் உடைத்து உள்ளே நுழைந்த கொள்ளையர்கள், அங்கிருந்த 118 சவரன் தங்க நகைகளைத் திருடிச் சென்றனர்.

இந்தச் சம்பவம் தொடர்பாக விசாரணை நடத்திய கன்னியாகுமரி மாவட்ட காவல் கண்காணிப்பாளர் அன்ஷுல் நகர், மொத்தம் ஏழு தனிப்படை போலீஸாரை அமைத்து குற்றவாளிகளைத் தீவிரமாகத் தேடி வந்தனர். சுமார் 160 சிசிடிவி கேமராக்களின் காட்சிகளை ஆய்வு செய்த போலீஸார், நாகர்கோவில் முதல் தூத்துக்குடி மாவட்டம் ஸ்ரீவைகுண்டம் வரையிலான பாதைகளைக் கண்காணித்ததில் முக்கியத் தடயங்கள் கிடைத்தன. இதன் அடிப்படையில், கொள்ளைச் சம்பவத்தில் ஈடுபட்ட ஸ்ரீவைகுண்டத்தைச் சேர்ந்த சி. இசக்கிபாண்டி (30), முக்கூடல் பகுதியைச் சேர்ந்த இ. முருகன் (28), ஆலங்குளத்தைச் சேர்ந்த எம். முருகேசன் (30) மற்றும் திம்மராஜபுரத்தைச் சேர்ந்த பி. தங்கபாண்டி (39) ஆகியோர் கைது செய்யப்பட்டனர்.

முதற்கட்ட விசாரணையில், முதன்மை குற்றவாளியான இசக்கிபாண்டி, யூடியூபர் மதுமிதாவின் சமூக வலைதள வீடியோக்களை கடந்த ஆறு மாதங்களாகத் தொடர்ந்து கவனித்து வந்துள்ளார். அந்த வீடியோக்களில் மதுமிதாவின் குழந்தையின் பள்ளிப் பையில் இருந்த முகவரியை வைத்து, அவர் வசிக்கும் வீட்டை அடையாளம் கண்டுள்ளார். கடந்த செப்டம்பர் மாதம் முதல் தனது இருசக்கர வாகனத்தில் தொடர்ந்து அந்த வீட்டை நோட்டமிட்டு வந்த அவர், தம்பதியினர் வெளியூர் சென்றிருந்த சரியான தருணத்தைப் பயன்படுத்தித் திட்டமிட்டுக் கொள்ளையில் ஈடுபட்டுள்ளார். மற்ற மூன்று நபர்களும் கொள்ளையடிக்கப்பட்ட நகைகளைப் பதுக்கி வைத்து, அதை விற்பனை செய்ய உதவியது விசாரணையில் தெரியவந்தது.

காவல்துறையினர் அதிரடியாகச் செயல்பட்டு, கைது செய்யப்பட்டவர்களிடமிருந்து சுமார் 98 சவரன் தங்க நகைகளை மீட்டுள்ளனர். இந்தத் தம்பதியினர் தங்களது ஆடம்பரமான வாழ்க்கை முறையையும், அதிக அளவிலான நகைகளையும் யூடியூப் வீடியோக்கள் மூலம் தொடர்ந்து காட்சிப்படுத்தி வந்ததே கொள்ளையர்கள் இந்த வீட்டைத் தேர்வு செய்யக் காரணமாக அமைந்ததாகக் காவல் துறை தரப்பில் தெரிவிக்கப்பட்டுள்ளது. சம்பவம் குறித்து ராஜக்கமங்கலம் காவல் நிலையத்தில் வழக்கு பதிவு செய்யப்பட்டு, தற்போது கைது செய்யப்பட்ட நபர்கள் நீதிமன்றக் காவலுக்கு உட்படுத்தப்பட்டுள்ளனர்.